किसानहे अनुदानमे यान्त्रिक उपकरण
पहुरा समाचारदाता
धनगढी, ३ कार्तिक । दाइजो कृषि सहकारी संस्थासे कृषकहुक्रनहे अनुदानमे यान्त्रिक उपकरण वितरण करले बा ।
विश्व वैंकके आर्थिक सहयोगमे कृषि तथा पशुपंक्षी मन्त्रालय ग्रामीण उद्यम तथा आर्थिक विकास आयोजना मार्फत कृषि उपकरण वितरण करल हो । सहकारीसे शनिच्चरके रोज एककार्यक्रमके बिच व्यवसायिक तरकारी खेती उत्पादन ओ बजारीकरणके लाग कृषकहुक्रनहे ५० प्रतिशत अनुदान रकममे उपकरण सहयोग करल हो ।
पूर्व वन तथा वातावरण मन्त्री नारदमुनी राना, धनगढी उपमहानगरपालिकाके उपप्रमुख कन्दकला राना किसानहुक्रनहे यान्त्रिक उपकरण हस्तान्तरण करल रहिट ।
कृषकहुक्रनके व्यवसायिक तरकारी खेती उत्पादन ओ बजारीकरणमे सहयोगके लाग यान्त्रिक उपकरण सहयोग करल सहकारीके सचिव दिपक राज जोशी जानकारी डेलै ।
व्यवस्थापक बासुदेव राना सहकारीके सेयर सदस्य रहल २५ ठो किसानहे १२ थान पावर टिलर, मिनि टिलर १ थान, १० थान बोरिड्ड, टनेल, स्प्रे ट्यांकी लगायत सामानके लाग ६२ लाख, छ हजार १५४ रुपियाके सम्झौता अनुसार कृषहुक्रनहे यान्त्रिक उपकरण सहयोग करल जानकारी डेलै ।
कार्यक्रममे धनगढी उपमहानगरपालिका वडा नम्बर ७ के वडा अध्यक्ष मोतिराम राना सहकारीसे आर्थिक रुपसे विपन्न, कृषक, व्यवसायीहुक्रनहे ऋण उपलब्ध कैनाके साथे अनुदान सहयोग डेटी आइल बटैलै ।
ओस्टके सहकारीके सल्लाहकार नन्दलाल राना व्यवसायिक रुपमे तरकारी खेती कैटी आइल किसानहे टमान मेरिक सहयोग कैटी आइल बटैलै । कार्यक्रममे कृिष ज्ञानकेन्द्रके कामना कार्की, रिडके प्रतिनिधी राजकुमार चौधरी लगायत समाजसेवी वुद्धिजिवीहुक्रनके उपस्थिति रहल रहे । कार्यक्रम सहकारीके अध्यक्ष मानबहादुर रानाके घरगोसियाइमे हुइल रहे ।
