संसदीय रिपोर्टिङ सम्बन्धी क्षमता अभिवृद्धि प्रशिक्षण
पहुरा समाचारदाता
धनगढी, ३ कार्तिक । कैलालीमे सुदूरपश्चिम प्रदेशमे क्रियाशिल पत्रकारहुकनहे संसदीय रिपोर्टिङ सम्बन्धी क्षमता अभिवृद्धि प्रशिक्षण डेहल बा ।
संसदीय मामिला पत्रकार समाज कैलालीके आयोजनामे चिसापानीमे शुकसे सुरू हुइल प्रशिक्षण शनिच्चरके रोज सम्पन्न हुइल बा ।
युएनडीपीके संसद सहयोग परियोजनाके सहकार्यमे आयोजित कार्यक्रममे संसदीय रिपोर्टिङ सम्बन्धी रिपोर्टिङबारे क्षमता अभिवृद्धिबारे पत्रकारहे प्रशिक्षण डेहल रहे ।
संसदीय पत्रकारितामे लम्मा अनुभव रहल नेपाल पत्रकार महासंघके पूर्व अध्यक्षसमेत रहल अनलाइनखबरके प्रधान सम्पादक शिव गाउँले, बाह्रखरीके विशेष सम्पादक हरिबहादुर थापा ओ न्यूज एजेन्सी नेपालके सम्पादक कृष्णा पौडेल पत्रकारहसकनहे प्रशिक्षण डेले रहैं ।
उहाँहुक्रे संसदीय रिपोर्टिङके आधारभूत चिज, रिपोर्टिङके विषय, संसदभित्तर का–कैसिन मुद्दा उठान करना लगायतके विषयबारे समेत प्रशिक्षण करैले रहैं ।
नेपालमे संघीयता कार्यान्वयन होके सात प्रदेशमे संसदीय अभ्यास हुइल सात वर्ष होसेकल बा । मने संसदीय रिपोर्टिङबारे पर्याप्त ज्ञानके अभावमे संसदभित्तर हुइना टमान गतिविधि अपेक्षाकृत रूपमे उजागर हुइ सेकल नैहो ।
ओहे चिजहे मध्यनजर कैके संसदीय रिपोर्टिङमे क्रियाशिल पत्रकारहुकनके क्षमता अभिवृद्धिके लाग प्रशिक्षण डेहल संसदीय मामिला पत्रकार समाज जनैले बा ।
अस्टेक, संसदीय पत्रकार समाज शनिच्चरके रोज प्रदेश सभा सदस्यहुकनसँग अनुभव आदानप्रदान तथा अन्तरक्रिया समेत करले बा ।
उ क्रममे पत्रकारहुक्रे प्रदेश सभामे समाचार संकलनके क्रममे व्यहोरे परना जटिलता ओ सहजताबारे अपन अनुभव सुनैले रहैं ।
पत्रकारहुक्रे प्रदेशसभासँग विषयगत समितिके बैठकमे समेत समाचार संकलनके लाग सहज ओ नियमित रूपमे सहभागीता कराइपरना जोड डेले रहैं ।
प्रदेश सभा सदस्यहुक्रे फेन सञ्चार माध्यमसे खेलेपरना भूमिकाबारे धारणा ढरले रहैं । अन्तरक्रिया कार्यक्रममे सुदूरपश्चिम प्रदेशसभा सदस्य धर्मराज पाठक, डा. ताराप्रसाद जोशी, जानकी पौडेल ओ रामेश्वर चौधरी तथा जानकी गाउँपालिकाके अध्यक्ष गणेश चौधरीके सहभागिता रहे ।
पत्रकारहे संसदीय रिपोर्टिङबारे क्षमता अभिवृद्धि प्रशिक्षण तथा पत्रकार ओ सांसदबीचके कार्यक्रममे सहजीकरण करल युएनडिपीके संसद सहयोग परियोजनाके संसद मामिला अधिकृत क्यारिना श्रेष्ठ कार्यक्रमके उद्देश्यबारे जानकारी डेले रहैं ।
