जलवायु स्मार्ट उद्यमशीलता पुरस्कार दिवस
पहुरा समाचारदाता
धनगढी, ११ कार्तिक । क्रिएसन नेपालके आयोजनामे अँट्वारके रोज धनगढीमे प्रदेशस्तरीय जलवायु स्मार्ट उद्यमशीलताके पुरस्कार दिवस बनाइल बा । जलवायु स्मार्ट उद्यमशीलता कार्यक्रमके मुख्य उद्देश्य जलवायु ओ वातावरणीय चुनौतीहे सम्बोधन करना विचारधारा, आविष्कार ओ युवा उद्यमीहुकनके लाग अवसर प्रदान करना रहल बा ।
वातवरण तथा जलवायु विकासमे नेपाली युवा, युरोपेली संघके अर्थिक सहयोगमे युथ इनोभेसन ल्याब, रेस्टलेस डेभ्लपमेन्ट नेपाल, अनुसन्धान तथा दिगो विकास नेपाल ओ सिडिएमएससे संयुक्त रुपमे संचालित बहुवर्षिय परियोजना अन्तर्गत उ कार्यक्रम हुइल हो ।
कार्यक्रममे सुदूरपश्चिम प्रदेशके १५–२९ वर्ष उमेर समूहके युवाहुकनहे टमान माध्यमसे आवेदन आह्वान करल ओ उ मध्यसे उत्कृष्ट २० छनौट कैके बिगत ३ महिनासे आवश्यकता अनुसार बृद्धि विकासके लाग तालिम ओ अभिमुखिकरणके तालिम प्रदान करल रहे ।
कार्यक्रममे ढाँचा बमोजिम छनौट हुइल २० जाने समूहके प्रतिस्पर्धीहुक्रे अपनअपन भावी ओ हाल सञ्चालनमे रहल जनवायु स्मार्ट व्यवसायके आईडिया प्रस्तुत करले रहैं । उमध्ये उत्कृष्ट ६ जहनहे टमान मूल्यांकनके आधारमे छनौट कैके अनुदान प्रदान करले बा ।
परियोजनमे उल्लेख रहल अनुदान आर्थिक सहयोग स्वरुप रकम १ एक लाख २५ हजार नगद उत्कृष्ट ६ जहनहे प्रदान करल बा । कार्यक्रम सुदूरपश्चिम प्रदेशके मुख्यमन्त्री कमलबाहदुर शाह उद्घाटन करले रहैं ।
कार्यक्रममे युरोपेली संघके कार्यक्रम प्रबन्धक रोसल्बा टुसे, क्रिएसन नेपालके संस्थापक अध्यक्ष आनन्द मिश्र, युथ इनोभेसन ल्याबके कार्यकारी निर्देशक प्रदीप खतिवडा, नीडस् नेपालके कार्यकरी निर्देशक भवाराज रेग्मी लगायतके उपस्थिति रहे ।
निर्णायक मण्डलमे कैलाली उद्योग वाणिज्यके महासचिव ओमबहादुर विष्ट, बाल्मिकी इन्टरनेशनल स्कूलके अध्यक्ष दिनेशराज भण्डारी ओ एक्सिस स्कूलके प्रमुख अनिता पन्त रहैं ।
