कैलारीमे फुला प्रदर्शनी कार्यक्रम
पहुरा समाचारदाता
हसुलिया,१३ कार्तिक । कैलारी गाउँपालिकामे पुष्प (फुला) प्रदर्शनी तथा अन्तरक्रिया कार्यक्रम हुइल बा ।
कैलारी गाउँपालिकाके समव्वय तथा सहास नेपालके आयोजनामे मंगरके रोज पुष्प (फुला) प्रदर्शनी तथा अन्तरक्रिया कार्यक्रम कैगिल हो । बे्रट फर डाई वेल्टके आर्थिक सहयोगमे सहास नेपालके सहजीकरण तथा कैलारी गाउँपालिकाके समन्वयमे वडा नम्बर ३, ४ ओ ७ नम्बरके पाँच ठो कृषक समुह फुला खेती करले रहे ।
पुष्प (फुला) प्रदर्शनीमे वडा नम्बर ४ के गाउँ असिना टोलके सक्षम कृषक समुह, वडा नम्बर ४ प्रगती कृषक समुह, वडा नम्बर ४ के मिलन उन्नती कृषक समुह, वडा नम्बर ३ के दु्र्गा कृषक समुह ओ वडा नम्बर ७ शिवपुरके तुल्सी जारी कृषक समुहसे कैगिल पुष्प (फुला)के प्रदर्शनी कैगिल हो ।
फुलाके पर्व शुभ डेवारी ओ छठ पर्वके अवसरमे शुभकामना अदान प्रदानके साथे पुष्प प्रर्दशनी तथा अन्तरक्रिया कार्यक्रम कैलारी गाउँपालिका अध्यक्ष राजसमझ चौधरीके अध्यक्षतामे हुइल ओ गाउँपालिका उपाध्यक्ष भगवतीकुमारी चौधरीके वरका पहुना हुइल रहे ।
कार्यक्रममे सम्बोधन करटी गाउँपालिका अध्यक्ष राजसमझ चौधरी खुला सिमानाके कारण भारतसे प्लाष्टिक फुला अइनाके कारण यहाँक उत्पादक कृषक मारमे परल बटैलै । उहाँ कहलै, ‘डेवारीमे प्लाष्टिक माला भारतसे अइना करठ । सेकटसम हम्रे रोक्ना प्रयास करब । ओ अबसिक कार्यपालिका बैठकसे प्लाष्टिक माला विक्रीमे प्रतिवन्ध लगैबी ।’
स्थानीयस्तरमे उत्पादन हुइना फुलाके बजारीकरणके लाग सेकटसम अपन गाउँठाउँमे खपट कैना ओ बाँचल फुला बाहेर पठाई सेक्ना उहाँ बटैलै ।
कार्यक्रमके वरका पहुना तथा गाउँपालिका उपाध्यक्ष भगवती कुमारी चौधरी पुष्प खेती कलेक नगदेवालीमे पर्ना ओरसे यम्ने महिला डिडीबाबुनके संलग्न डेखल कारण आर्थिक रुपमे निर्भर बनाई सेक्ना बटैली ।
फुला खेतीमे ढेर लगानी लग्ना मने उत्पादन अनुसार मोल नैपैना कृषक समुहके समस्या बुझल ओरसे पालिकासे करे सेक्ना सहयोगबारे छलफल कैना उहाँ बटैली ।
कार्यक्रममे वडा नम्बर ३ वडा अध्यक्ष सन्तराम चौधरी, प्रमुख प्रशासकीय अधिकृत खगेन्द्रराज जोशी, नेपाली काँग्रेस कैलारी गाउँपालिका सभापति कृष्ण प्रसाद चौधरी, गाउँपालिकाके सामाजिक विकास शाखा प्रमुख यगम कलेल, मिलन उन्नती कृषक समुह, वडा नम्बर ३ के शुसिला कठरियालगायत मन्तव्य राखल रहिट ।
कार्यक्रमके उद्देश्यबारे जानकारी तथा स्वागत मन्तव्य सहास नेपालके परियोजना अधिकृत सौरव भण्डारी डेहल रहिट । लिफ्ट परियोजना मार्फत पुष्प खेतीमे सहयोग करके महिला तथा सीमान्तकृत समुदायके आर्थिक स्तरमे वृद्धि कैना उद्देश्य लेहल उहाँ बटैलै ।
पुष्प प्रर्दशनी तथा अन्तरक्रिया कार्यक्रममे कृषक समुहके प्रतिनिधिहुक्रे स्थानीय स्तरमे उत्पादन हुइल फुलाके बजारीकरण ओ भारतसे अइना प्लाष्टिक फुलमालाके रोक्ना माग करल रहिट । यिहे सहास नेपालसे प्लाष्टिक जन्य फुला मुक्त पालिका घोषणा अभियान सम्बन्धी ७ बुँदे प्रतिवद्धतापत्रमे हस्ताक्षर कैगिल बा ।
कार्यक्रममे वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेमबहादुर चौधरीलगायत टमान शाखाके प्रमुख, कार्यपालिका सदस्य, सहास नेपाल टिम, कृषक समुहके सहभागिता रहे । यिहे विच वडा नम्बर ३ के सखिया, झुम्रा नाँच डेखागिल रहे । कार्यक्रमके संचालन सहास नेपालके सुनिता चौधरी करल रहिट ।
