कैलारीके पुष्प व्यवसायीहुकन बजारीकरण समस्या

पहुरा समाचारदाता
हसुलिया, १३ कार्तिक । कैलारी गाउँपालिकाके तीन वडामे यी पाँच कृषक समुहसे सामुहिक पुष्प (फुला) खेती सुरुवाट करले बटै ।

पाँचु कृषक समुहके फुलरिया बारीमे ढकमक्क फुला फुलल बा । सहास नेपालके सहयोग ओ कैलारी गाउँपालिकाके समन्वयमे वडा नम्बर ४ असिना टोलमे रहल सक्षम कृषक समुह २ कटठा, कैलारी–४ के प्रगती कृषक समुहसे ३ कटठा, वडा नम्बर ४ मे रहल मिलन उन्नती कृषक समुहसे डेढ कटठा, वडा नम्बर ७ मे रहल तुल्सी जारी कृषक समुहसे १ कटठा ओ वडा नम्बर ३ रहल दुर्गा कृषक समुहसे २ कटठामे लगाइल सयपैत्री फुला फुलके तयारीमे अवस्थामे रहल बा ।

सक्षम कृषक समुहके लक्ष्मी चौधरी –‘कहठी २ कटठामे लगाइल फुला फुलके तयारीमे अवस्थामे बा । अब्बे डेवारीमे जटरा डेहे सेक्ना अवस्था बा । मने उत्पादन हुइल फुला विक्री हुई कौनो ग्यारेन्टी नैहो ।’ भारतसे प्लाष्टिक फुला खुलम खुला आयत हुइटी रहल बा । उहीहे रोके सेक्लेसे ओ स्थानीय उत्पादननहे बजारीकरण करे सेक्लेसे केल मेहनत ओ लगानी अनुसार फाइदा लेहे सेक्जाई ।’

दुर्गा कृषक समुहके शुशिला कठरियाफे फुला लगासेकलपाछे यहाँसम पुगे लगानी ढेर लागल मने मेहनत अनुसार फुला विक्री नैहुइल बटैली । औरेक बोरिङके पानीसे सिचाई करेबेर महंगा विद्युत महसुल तिरेपर्ना बाध्यता ृउहाँ सुनैठी ।
तीन कटठा क्षेत्रफलमे खेती पुष्प खेती करल कैलारी–४ के प्रगती कृषक समुहके अध्यक्ष कमला चौधरी अब्बे दुई सय रुप्या किलोग्राममे फुला विक्री कैना बाध्य रहल बटैली । उहाँ कहली, ‘नैबेच्लेसे फुला सरके जाई कना डर बा, नैकी उ रेटमे विक्री करेबेर मेहनत अनुसार फाइदा नैहो ।’

कैलारी गाउँपालिका वडा नम्बर ४ के मिलन कृषक समुह रामपति चौधरी गैल बरससे फुला खेती सुरुवाट करल मने गैल बरस जस्टे उत्पादन नैहुइल बटैली । उहाँ कहली, ‘सुरु सुरुमे २७५ रुप्या प्रति किलोके दरसे फुला विक्री करल मने अब्बे २०० मे विक्री करटी रहल बटी ।

सहास नेपालके परियोजना अधिकृत सौरव भण्डारी कृषक समुहहुकनहे पुष्प खेतीके लाग सयपत्री फुलाके विया ओ प्राविधिक सहयोग करल बटैलै ।
कैलारी गाउँपालिकाके अध्यक्ष राजसमझ चौधरी स्थानीय पुष्प व्यवसायीहुकनसे उत्पादन करल फुलाके बजारीकरण स्थानीय सरकारहे दायित्व हो । ओकर लाग कैलारी गाउँपालिकासे भारतसे अइना प्लाष्टिक फुला प्रतिवन्ध लगैना बटैलै । उहाँ कहलै, ‘अबसिक बैठना कार्यपालिकाके बैठकसे प्लाष्टिक फुला आयत पूर्णरुपमे प्रतिबन्ध लगैबी ।
गाउँपालिका उपाध्यक्ष भगवती कुमारी चौधरी पुष्प खेतीओर महिलाके आर्कषण बहूल बटैली । उहाँ कहली, ‘यी फुला खेतीहे बेमौसमी रुपमे उत्पादन करेसेक्लेसे आम्दानी ढेर कमाई सेक्जाई ।

प्लास्टिकजन्य फूल मुक्त पालिका घोषणा अभियानहे सफल बनाइक लाग ७ बुँदे प्रतिवद्धतापत्रमे हस्ताक्षर कैगिल बा । जौन बुँदामे वातावरणमैत्री फूलके प्रयोगके अभिवृद्धि ओ प्लास्टिकजन्य फूला प्रयोगमे रोकथाम करके प्लास्टिकजन्य फूल मुक्त पालिका घोषणा कैना नम्बर १ मे उल्लेख करल बा ।

स्थानीय तहके नीति तथा कार्यक्रममे पुष्प खेतीहे प्रथामिकता डेना, विपन्न तथा सिमान्तकृत समुदायके जीविकोपार्जनके आम्दानीके स्रोतके रुपमे विकास करटी स्वदेशी फूल उत्पादनमे वृद्धि तथा उपभोगमे आत्मा निर्भर बनैना कहल बा ।

समुदाये सचेतना कार्यक्रम सञ्चालन करके फल उत्पादन कैना कृषकहुकनहे जागरुक बनैना, कृषि जैविक विविधताके संरक्षण ओ परागसेचन जैसिन महत्वपुर्ण वातावरणीय सवा अभिवृद्धिके लाग, पुष्प खेतीहे अभियानके रुपमे विकास कैना कहल बा ।
ओस्टेक करके उत्कृष्ट फूल उत्पादक कृषकमे उ समूहहे सम्मान कैना ओ क्षति जोखिम भार कमके लाग बीमाके व्यवस्था कैना ओ पुष्प खेतीके सम्भावानाहे अध्ययन करके मूल्य श्रृखलामे जोड डेना रहल बा ।