मदिरा नियन्त्रणके लाग सचेतना आवश्यक
पहुरा समाचारदाता
धनगढी, १४ कात्तिक । मदिराके हानिकारक प्रयोगसे महिला ओ बालबालिकाके अधिकार हनन् हुइना हुइल ओरसे उहीहे नियन्त्रणके लाग सचेतनाके आवश्यकता रहल कहटी घरपरिवार छरछिमेक फेन जिम्मेवार बनेपर्नामे जोड डेहल बा ।
सिविन नेपाल कैलालीके आयोजनामे मंगरके रोज धनगढीमे हुइल ‘मदिराके हानिकारक प्रयोगः अधिकार ओ विकासके एक मुद्दा’ विषयक अन्तरक्रिया कार्यक्रमके सहभागिहुक्रे ओम्ने जोड डेहल हुइट । कार्यक्रममे सहभागिहुक्रे मदिराके हानिकारक प्रयोगसे घरबार बिग्रनाके साथे बालबालिकाहुक्रनके शिक्षा, स्वास्थ्यमे ढेर प्रभाव पर्ना बटाइल रहिट । ओस्टके उहाँहुक्रे मदिरा प्रयोगहे न्यूनीकरण तथा रोकथामके लाग सचेतनाके साथे नियमन कैना आवश्यक रहल बटाइल रहिट ।
धनगढी उपमहानगरपालिकाके महिला बालबालिका शाखाके पंकजा जोशी मदिराके हानिकारक प्रयोगहे रोकथाम तथा नियन्त्रणके लाग सचेतनाके कार्यक्रमहे अभियानके रुपमे लैजाइ पर्ना बटाइल रही ।
उहाँ उ अभियानहे अकली सफल पारे नैसेक्ना हुइल ओरसे यहाँके सरकारी तथा गैरसकारी निकाय तथा सरोकारवाला सक्कु निकायके साथ सहयोगके आवश्यकता रहल बटाइल रही ।
एनप्याबसन कैलालीके टीएन ढकाल मदिरा नियन्त्रणके लाग घरपरिवार तथा समाजमे सचेतनाके आवश्यकता रहल औँल्याइटी अभिभावक फेन जिम्मेवार बने पर्ना बटाइल रहिट । ओस्टके उहाँ मदिरा बिक्रीमे नियन्त्रणके साथे मदिरा नियन्त्रण सम्बन्धी बनल ऐन कानूनहे फेन प्रभावकारी रुपमे लागू करे पर्ना जोड डेहल रहिट ।
महिला बालबालिका तथा जेष्ठ नागरिक सेवा केन्द्र सुदूरपश्चिमके मानसिंह ऐडी मदिरा नियन्त्रणके लाग सरकारी तथा गैरसरकारी निकाय समन्वय सहकार्य सहित एकीकृत रुपमे सचेतनाके कार्यक्रम सञ्चालन करे पर्ना बटाइल रहिट ।
कार्यक्रममे सिविन नेपालके भगवती श्रेष्ठ मदिराके हानिकारक प्रयोगः अधिकार ओ विकासके एक मुद्धा विषयक आपन प्रस्तुती राखल रही ।
कार्यक्रममे सिविन नेपालके सागर भण्डारी, टमान संघसंस्थाके प्रतिनीधि, सरोकारवाला निकायके सहभागिता रहल रहे । कार्यक्रमके सहजीकरण सिविन नेपाल कैलालीके कार्यक्रम अधिकृत हरिलाल चौधरी करले रहिट ।
