डेनमार्कके अनुसन्धानकर्मी भल्मन्सासे छलफल

पहुरा समाचारदाता
धनगढी, २२ कार्तिक । डेनमार्कके अनुसन्धानकर्मीहुँक्रे कैलाली ओ कञ्चनपुरके भल्मन्साहुँक्रनके आब्बके अवस्थाबारे छलफल करले बटै ।

डेनमार्कके अनुसन्धानकर्मी क्यानुड ओ नेइलसे कैलाली जिल्लाके कैलारी गाउँपालिका, जानकी गाउँपालिका अध्यक्ष, उपाध्यक्ष, कञ्चनपुरके बेलारी नगरपालिका, लालझारी गाउँपालिकाके भल्मन्साहुँक्रसंग छलफल करल रहिट ।
छलफलमे स्थानीय तह ओ भल्मन्सा विचके सम्बन्ध, सहकार्यबारेमे बाटचिट कैगिल बा ।

डेनमार्कके नागरिकहुँक्रे नेपालके संविधान २०७२ जारी हुइल, संघीय अइना आघे ओ संघीयता लागु हुइलपाछे भल्मन्साहुँक्रनके अवस्थामे अइलक परिवर्तन बारे अनुसन्धान कैटी रहल बटै ।

छलफलमे कैलारी गाउँपालिका वडा नम्बर ६ के भल्मन्सा खगेन्द्र चौधरी संघीयता आइलपाछे भल्मन्साहुँक्रनके अवस्थामे ढेर परिवर्तन आइल बाट बटैलै । उहाँ कहलै, ‘ंसंघीयता आइलपाछे टमान पालिकामे भल्मन्सा÷बरघर ऐन बनागिल बा । पहिले भल्मन्साहुँक्रनहे कौनो मेरिक तालिम नैडेहल रहे । अब्बे तालिम पाइलपाछे भल्मन्साहुँक्रे सचेत हुइल बटै । पालिकासे भल्मन्साहुँक्रनहे संचार खर्चके व्यवस्थाफे कैगिल बा ।’

डेनमार्कके अनुसन्धानकर्मीहुँक्रे योजना प्रक्रियामे भल्मन्साहुँक्रनहे समावेश कैना की नैकैना, अब्बे गाउँघरमे विकासके गतिविधिमे भल्मन्साहुँक्रन कटरा सहभागी कराजाइठ कना प्रश्न करल रहिट ।

कैलारी गाउँपालिकामे हुइल छलफलमे गाउँपालिका उपाध्यक्ष भगवतीकुमारी चौधरी कैलारीमे भल्मन्सा ऐन बनाके पहिल फयारा संशोधन कैसेकल ओ कार्यविधि बनैना बाँकी रहल जानकारी डेहल रहिट । थारु समुदायके परम्परासे चल्टी भल्मन्सा कायम रहल, मरनीकरण्ी, भोजभटेररमे सक्कु जाने सहयोग कैना, सामाजिक कार्यमे सक्कु जाने मिलजुलके काम कैना चलन अभिन रहल उहाँ जनैली । थारु समुदायके कौनो खैनाचिज बाँटचुटके खैना चरल कायम रहल बटैली ।

ओस्टेक करके डेनमार्कके अनुसन्धान टोली कञ्चनपुरके भल्मन्सा, थारु कल्याणकारिणी सभा, बोट समुदाय ओ रानाथारु समुदायसे छलफल कैलक गुर्वाबाबा एमएफके प्रमुख एकराज चौधरी जानकारी डेले । विदेशी अनुसन्धानकर्मीहुक्राहे दोभाषेक रुपमे बाँधुराम चौधरी सहयोग कैटी रहल बटै । शुकके रोज बेलौरी नगरपालिका ओ धनगढी उपमहानगरपालिकाके जनप्रतिनिधि, भल्मन्साहुँक्रनसे छलफल कैना जनागिल बा ।