धनगढीमे १३ हजार ६ सय रुखुवा लगागिल

पहुरा समाचारदाता
धनगढी, २५ कार्तिक । कैलालीके धनगढी उपमहानगरपालिकासे ‘हरित धनगढी’ अभियान अन्तर्गत हालसम १३ हजार ६ सय सात ठो रुखुवा लगैले बा ।

हरियाली प्रवद्र्धन कार्यक्रम अन्तर्गत उपमहानगरपालिकासे २३ जातके रुखुवा लगाइल बा । धनगढीके सडक क्षेत्रमे फल लग्ना पाँच जातके रुखुवा लगाइल बा । बाँकी फूल तथा हरियालीके लाग वृक्षारोपण करल बा । उपमहानगरपालिकाके जिन्सी शाखा प्रमुख कृष्ण जोशी सडकमे वृक्षारोपणके काम जारी रहल बटैलै ।

उहाँ रुखुवाके संरक्षणसमेत उपमहानगरपालिकासे करटी आइल बटैलै । धनगढीहे हरियाली प्रवद्र्धन कैना ओ पर्यावरणमैत्री बनैना उद्देश्यसे ‘हरित धनगढी’ अभियान अन्तर्गत गैत आर्थिक वर्षसम पाँच हजार पाँच सयके संख्यामे ट्रि–गार्डसहित वृक्षारोपण करल बा । हरियाली धनगढी प्रवद्र्धन कार्यक्रम २०७९ फागुनसे सुरु करल उपमहानगरपालिकासे सडकके मिडियन तथा सडक दायाँबायाँ वृक्षारोपण करल हो ।

वृक्षारोपणके लाग वृक्षारोपण केल नैहुके उपमहानगरपालिकासे लगाइल रुखुवाके सुरक्षाके लाग ट्री–गार्ड, तारजाली लगैना ओ आवश्यकताअनुसार मल तथा सिँचाइके फे व्यवस्था करके नियमित हेरचाह करटी आइल बा । उपमहानगरपालिकासे कर्मचारी तथा नगर प्रहरी खटाके रुखुवाके संरक्षण करटी आइल बा ।

उपमहानगरपालिकासे हालसम मोहनापुल–अत्तरिया ६ लेन सडक, चौराह–कैलाली पुल सडक, धनगढी–खुटिया सडक, वनदेवी मन्दिर क्षेत्र, हुलाकी राजमार्गके फूलबारीसम, धनगढी विमास्थल सडक, धनगढी चक्रपथ सडक, क्याम्पसरोड, कबर्डहल क्षेत्र ओ मोहना आर्यघाट क्षेत्रमे ट्री–गार्डसहित वृक्षारोपण करले बा । छतिवन, जारुन, एलिसा, कल्सी, सगर, अलमोडा, साइपस, धुपी, असारे, सिरिस, चम्पा करके २३ जातके रुखुवा लगाइल बा ।

पाँच जातके रुखुवा फल डेना उपमहानगरपालिकासे बटैले बा । उपमहानगरपालिकाके जिन्सी शाखा प्रमुख जोशी रुखुवाके संख्या बह्रटी गैल बटैलै । वृक्षारोपण कार्यक्रमहे उपमहानगरपालिकासे ‘हरित धनगढी’ नाम डेहल बा । ट्री–गार्डमे कौनो संघ–संस्था तथा व्यक्तिसे अपन नाम धारे चाहलेसे उपमहानगरपालिकासे प्रति ट्री–गार्ड पाँच हजार रुप्या लेना करल बा ।