घोरीघोरा लवाङ्गी पूजा तथा थारु सांस्कृतिक महोत्सव सुरु

पहुरा समाचारदाता
सुखड, १९ अगहन । कैलालीके घोडाघोडी नगरपालिका–१, घोरीघोरा मन्दिर परिसरमे घोरीघोरा लवाङ्गी पूजा तथा थारु सांस्कृतिक महोत्सव–२०८१ सुरु हुइल बा ।

घोडाघोडी नगर भल्मल्सा कार्य समिति, घोडाघोडी सन्त समागम समाज ओ घोडाघोडी तथा संस्कृति संरक्षण समाजके संयुक्त आयोजनामे “हमार संस्कृति हमार पहिचान, संस्कृति जगेर्ना करना हमार अभियान” कना मूल नाराके साथ घोरीघोरा मन्दिर परिसरमे महोत्सव सुरु हुइल हो ।

बुधके रोज सुदूरपश्चिम प्रदेशक उद्योग, वन, वातावरण तथा पर्यटन मन्त्री लक्ष्मण किशोर चौधरी घोरीघोरा लवाङगी पूजा तथा सांस्कृतिक महोत्सवके उदघाटन करल रहिट ।

कार्यक्रममे प्रदेश सरकारके आर्थिक मामिला मन्त्रालयके राज्य मन्त्री प्रकाश बहादुर बम, कैलाली–३ प्रदेशसभा (२) के सांसद खुसीराम डगौरा, घोडाघोडी नगरपालिकाके उप–प्रमुख गुलियाकुमारी चौधरी, जनप्रतिनिधि, राजनीतिक दलके नेतालगायत टमान व्यक्तिके सहभागिता रहे । महोत्सव यिहे अगहन २१ गतेसम हुइना बा ।