एक्सिस विद्याश्रमके २०औं वार्षिकोत्सव
पहुरा समाचारदाता
धनगढी, ३ फागुन । धनगढी उपमहानगरपालिका वडा नम्बर ५ स्थित एक्सिस विद्याश्रम सेकेण्डरी स्कूलके २०औं वार्षिकोत्सव तथा अभिभावक दिवस शनिच्चरके रोज सुरु हुइल बा । शनिच्चरके रोज कक्षा १ से कक्षा ५ समके वार्षिकोत्सव तथा अभिभावक दिवस मनाइल हो ।
विद्यालयके प्राचार्य अनिता पन्तके घरगोसियाइमे कार्यक्रम हुइल हो । कार्यक्रममे प्राचार्य पन्त विद्यार्थीनहे सफल बनाइक लाग विद्यालयके टिचर किल नैहोके अभिभावक फेन जिम्मेवार बने पर्ना बटाइल रही । उहाँ कहली, ‘एकठो विद्यार्थीहे सफल बनाइक लागपह्रैना लिखैनामे विद्यालयके शिक्षक शिक्षिका जत्रा केयर करे परठ्, ओत्रहे केयर ओकर अभिभावक, घर परिवार फेन करे पर्ना जरुरी रहठ् ।’
प्राचार्य पन्त विद्यालयमे विद्यार्थीनहे किताबी ज्ञानसँगे व्यवहारिक ज्ञान फेन डेना ओर अग्रसर रहल बटाइल रही । उहाँ कहली, ‘हम्रे किताबी ज्ञानसँगे विद्यार्थीनहे व्यवहारिक ज्ञान डेना ओर ध्यान डेले बाटी । समाज घरपरिवारमे घटल घटना अथवा कौनो फेन विषय बस्तुबारे विद्यार्थीहुक्रे अनभिज्ञ रहे सेक्ठै । उ बारे हम्रे विद्यार्थीनहे जानकारी करैनाके साथेविद्यार्थीनहे रहल प्रतिभासे लेके विद्यार्थीनके सीपहे फेन प्राथमिकतामे रख्ले बाटी ।’
उहे बिच वार्षिकोत्सवके अवसरमे आयोजित टमान मेरिक प्रतियोगिता तथा कक्षामे उत्कृष्ट हुइल विद्यार्थी लगायत अभिभावकहे प्रमाणपत्रसे सम्मान करल रहे । कार्यक्रममे टमान मेरिक सांस्कृतिक प्रस्तुति फेन प्रस्तुत करगिल रहे । वार्षिकोत्सव कार्यक्रम काल्ह (अँट्वारके राेज) सम्पन्न हुइ ।
