स्वरोजगार विकास कोषसे ५१ पालिकाके सहकारीहे कर्जा प्रवाह कैना

पहुरा समाचारदाता
धनगढी, ८ चैत । सुदूरपश्चिम प्रदेश स्वरोजगार विकास कोषसे ५१ पालिकाके सहकारीहे कर्जा प्रवाह कैना जनैले बा ।
कोषके कार्यकारी निर्देशक चुडमणि तिम्सिना पहिल प्रथामिकता कर्जा नैपुगल ५१ पालिकाके सहकारीहे एक प्रतिशतके दरसे कर्जा प्रवाह कैना जनैले बटै ।

पुँजी, सीप एवम् लगानीके स्रोतके अभाव हुइल वेरोजगार जनशक्तिहे सीप सिकाई उद्यमशीलताके विकास, उत्पादनमे वृद्धि करके आत्मनिर्भर अर्थतन्त्र निर्माणमे योगदान डेहलक लाग कर्जा प्रवाह करटी आइल जनैलै ।

श्रमप्रतिके सम्मान कैना जनशक्ति निर्माण करटी विनाधितो सहुलियत दरमे कर्जा प्रवाह करके स्वदेशमे स्वरोजगार बनाउन सुदूरपश्चिम प्रदेश स्वरोजगार विकास कोष ऐन, २०७५ः सुदूरपधिम प्रदेश स्वरोजगार विकास कोष नियमावली, २०७६ ओ सुदूरपश्चिम प्रदेश स्वरोजगार विकास कोष कर्जा कार्यविधि, २०७९ बमोजिम कोषसे सुदूरपश्चिम प्रदेशके विपन्न वेरोजगार युवाहुकनहे सीपमूलक तालिम डेना ओ सहुलियत व्याजदरमे कर्जा प्रवाह कैना कार्य करटी आइल उहाँ बटैलै ।

वैदेशिक रोजगारसे लौटल लउण्डा लउण्डी, नियमित अध्ययन छोरल शैक्षिक वेरोजगार जनशक्ति, उद्यम करे चाहल पुँजीके अभावमे कौनो पेशा व्यवसाय सञ्चालन करे नैसेकल लउण्डा लउण्डी, कौनो तालिम प्राप्त करके बेरोजगार रहल जनशक्ति, द्वन्द्वपीडित, अपाङता, घाहिल व्यक्ति, वेपत्ता तथा शहीद परिवार एकल महिला, उत्पीडित जाति, जनजाति, दलित, लोपोन्मुख जाति ओ पिछरल क्षेत्र तथा महिला, आर्थिक तथा सामाजिक रुपसे पिछरल ओ गरिबीके रेखाटरे रहल व्यक्ति, परिवार वा समुदाय एवम् प्रदेश सरकारसे तोकल अन्य क्षेत्र, वर्ग ओ समूहहे कर्जा प्रवाह कैना निर्देशक जनैलै ।

कोषसे चालु आ.व. ०८१÷८२ के माघ मसान्तससम ३९ सहकारी संस्थाहे दुसरा किस्ता वापत रु. १३ करोड १० लाख कर्जा प्रवाह करले बा । १४ सहकारी संस्थासे वार्षिक किस्ता रु. २ करोड ४ लाख ६६ हजार ५ सय २०८१ पुससमके सक्कु किस्ता रकम असुल हुइल उहाँ जनैलै ।

चालु आ.व. २०८१÷८२ के माघमसान्तसम कुल आय ८७.७७ लाख, ९९ सहकारी संस्थासे रु. २३.९१ लाख व्याज असुल (पहिल ओ दुसरा त्रैमासिक अवधिके क्रमशः रु. ११.५५ लाख ओ रु. १२.३६ लाख रहल बा । बैंक निक्षेपसे रु. ६३.८६ लाख व्याज प्राप्त २०८१ पुससमके सक्कु व्याज असुल हुइल बा । १८ सहकारी संस्थाके ५४ जाने कर्जाग्राही विपन्न बेरोजगार नैरहल वैदेशिक रोजगारमे गैल पाइल ओरसे रु.८८ लाख ४० हजार रकम फिर्ता÷असुल करल बा ।

३३ सहकारी संस्थाके दुसरा दुसरा किस्ता प्रवाह कैना आघे पूर्व स्थलगत अनुगमन करल रहे २२७ जानेमे महिला १४०, पुरुष८७ विपन्न बेरोजगार व्यक्तिहुकनके सहभागितामे स्वरोजगार साक्षरता सम्बन्धी ६ ठो अभिमुखीकरण कार्यक्रम सञ्चालन करल उहा जनैलै ।

धनगढी उपमहानगरपालिका संगके लागत साझेदारीमे सीप तथा रोजगार मेला २०८१ मे फागुन ८ गतेसे मोवाइल मर्मत ओर ५० जाने, इलेक्ट्रिकल गाडी मर्मत ओर २५ जाने ओ मोटर साइकल मर्मत ओर २५ जाने करके जम्मा १०० जना लउण्डा लउण्डीहुक्रे ३० दिने तालिममे सहभागी हुइल कार्यकारी निर्देशक तिम्सिना जनैलै ।

स्टार्टअप कार्यक्रम सञ्चालन कार्यविधि, २०८१ के मस्यौदा तयार करके कोष सञ्चालक समिति समक्ष पेश हुइल सुदूरपश्चिम प्रदेश स्वरोजगार विकास कोष ऐन, २०७५ के समसामयिक संशोधनके लाग प्रक्रिया आघे बह्रैना मन्त्रालयसंग अनुरोध करल बा ।

कोष परिचालन ओ मौज्दातके अवस्थामे कोषहे प्राप्त मूल पुँजी रु. १ अर्व रहे । ०८१ माघ मसान्तसम आर्जित खुद व्याज रकम रु. १० करोड ८४ लाख ०५ हजार ८७८ रुप्या २४ पैसा, ९ जिल्लाके ९९ सहकारी संस्था मार्फत २ हजार ८३४ जहनसंग मौज्दात रहल कर्जा रकम रु. ५४ करोड ३३ लाख ५९ हजार ५०३ रुप्या ७६ रहल उहाँ जनैलै । कोषसंग मौज्दात रहल रकम रु. ५६ करोड ५० लाख ४६ हजार ३७८ रुप्या २४ पैसा रहल बा । चालु आ.व. २०८१÷८२ के बाँकी अवधिमे असुल हुइना सावाँ किस्ता रकम रु ९.६३ करोड, असुल हुइना व्याज रकम रु. ६० लाख रहल जनागिल बा ।

कर्जाके अवधि, किस्ता ओ व्याजसम्बन्धी व्यवस्थामे कोषसे उपलब्ध करैना खुद्रा कर्जा ओ थोक कर्जाके अवधि परियोजनाके नगद प्रवाहके आधारमे ढेर पाँच वर्षसम रना जनागिल बा ।

कोषके उप कार्यकारी निर्देशक पविन्द्र शाही हालसम २ हजार ९१६ जाने स्वरोजगार व्यवसायके लाग ६०.०२ करोड कर्जा प्रवाह करल जनैलै । कोषसे ९ जिल्लाके ३७ पालिकामे रहल ९९ सहकारी संस्थासंगके वित्तीय साझेदारीमार्फत कोष ऐन २०७५ः कोष नियमावली, २०७६, कोष कर्जा कार्यविधि, २०७१ अनुसार संस्थामार्फत सरल कर्जा प्रवाह करल जनैलै ।

सुदूरपश्चिम प्रदेश स्वरोजगार विकास कोष ओ पत्रकार विच साक्षात्कार कार्यक्रमके कोषके कार्यकारी निर्देशक चुडामणि तिम्सिनाके अध्यक्षतामे हुइल रहे । कार्यक्रममे स्वागत मन्तव्य उप कार्यकारी निर्देशक प्रविन्द्र शाही ओ संचालन लेखा अधिकृत जयराज जोशी करल रहिट ।