जनकपुरमे डुसरा अन्तर्राष्ट्रिय थारु सम्मेलन हुइना
पहुरा समाचारदाता
धनगढी, ४ चैत । मधेस प्रदेशके जनकपुरमे डुसरा अन्तर्राष्ट्रिय थारु सम्मेलन हुइना हुइल बा । थारु अन्तर्राष्ट्रिय महासभाके आयोजनामे नेपाल तथा भारतके थारु अगुवा, नेता तथा बुद्धिजीविहुकनके सहभागितामे इहे चैत २८ गते सम्मेलन हुइना हुइल हो ।
धनगढीमे शुकके रोज एक कार्यक्रमके बिच थारु अन्तर्राष्ट्रिय महासभाके केन्द्रीय सदस्य श्रवण चौधरी सम्मेलनबारे जानकारी डेलै ।
थारु समुदाय एकजुट हुई पर्ना, राज्यके निकायमे पहुँच ओ आर्थिक, सामाजिक तथा राजनीतिक क्षेत्रमे आघे बह्रैना सम्मेलनके उद्देश्य रहल उहाँ बटैलै ।
थारु कल्याणकारिण सभा कैलालीके पूर्वसभापति माधव चौधरी सम्मेलनसे एक औरेक सांस्कृतिक अन्तरघुलनके साथे पहिचानके लाग आयोजना करे लागल बटैलै । ओस्टके उहाँ थारु समुदाय राज्यसे अपेक्षा करल अनुसार न्यायोचित स्थान ओ अवसरसे वञ्चित रहल ओरसे दवावके लाग फेन सम्मेलन महत्वपूर्ण रहना बटाइल रहिट ।
कार्यक्रममे थाकस केन्द्रीय पार्षद खडक बहादुर चौधरी, फुलमति चौधरी, धनगढी गाउँके भलमन्सा सरोज चौधरी, युवा अभियन्ता ठाकुर प्रसाद करिया प्रधान, थरुहट नेता खडक चौधरी, तारानगरके भलमन्सा गोठुँराम चौधरी, गायक राजुराज चौधरी, साहित्यकार सागरकुश्मी, नेपाल राना थारु समाज केन्दीय सदस्य सरिता राना, शेर बहादुर चौधरी, सनिगा महतो राना लगायतके उपस्थिति रहल रहे ।
