गोरखापत्र संस्थानके बोर्ड सदस्यमे पोखरेल ओ चौधरी नियुक्त
पहुरा समाचारदाता
काठमाडौँ, ८ चैत । गोरखापत्र संस्थान सञ्चालक समिति सदस्य (बोर्ड सदस्य) मे दुई जाने नियुक्त हुइल बाटै । सञ्चार तथा सूचना प्रविधि मन्त्रालयके मन्त्रीस्तरके निर्णयसे दुई जनहनहे बोर्ड सदस्यमे नियुक्त करल हो ।
नवनियुक्त बोर्ड सदस्यमे सञ्चार मन्त्रालयके उपसचिव तथा सञ्चार तथा सूचना प्रविधिमन्त्री पृथ्वीसुब्बा गुरुङके निजी सचिव सुरथ पोखरेलहे संस्थान ऐन २०१९ दफा ८ के उपदफा (१) के खण्ड (ग) अनुसार चैत ७ गतेसे लागु हुइना मेरके नियुक्त करल हो ।
उहे अनुसार गोरखापत्र अनलाइनके निमित्त सम्पादक लोकबहादुर चौधरी ‘लक्की’ बोर्ड सदस्यमे नियुक्त हुइल बाटै । उहाँहे संस्थान ऐन २०१९ के दफा ८ (१) के खण्ड (ङ) बमोजिम उ पदमे चार बरसके लाग नियुक्त करल हो ।
मन्त्रालयके सहसचिव कोशहरि निरौलासे हस्ताक्षरित पत्रअनुसार चैत ७ गतेके मन्त्रीस्तरीय निर्णयअनुसार उ पदमे पोखरेल ओ चौधरीहे नियुक्त कैना निर्णय करल हो । मन्त्रालयके सहसचिव निरौला बोर्ड सदस्यद्वय पोखरेल ओ चौधरीहे शुकके मन्त्रालयमे पत्र हस्तान्तरण करल रहिट ।
बोर्ड सदस्य पोखरेल रिसिङ गाउँपालिका–५, तनहुँ स्थायी निवासी हुइट । राजनीतिशास्त्र ओ इतिहासमे स्नातकोत्तर करल पोखरेल कानुनमे एलएलबी करले बाटै । नवनियुक्त सदस्य चौधरी धनगढी–५, कैलाली निवासी हुइट । समाजशास्त्र, राजनीतिशास्त्रमे स्नातकोत्तर करल चौधरी पत्रकारितामे दर्शनाचार्य (एमफिल)मे अध्ययनरत बाटै । गोरखापत्र अनलाइनके निमित्त सम्पादक चौधरी विगत १६ बरससे गोरखापत्रमे आवद्ध रहल बाटै ।
