नवजीवन सहकारीसे राइस मिल संचालन

पहुरा समाचारदाता
धनगढी, १० चैत । नवजीवन सहकारी संस्था लिमिटेडसे कैलालीमे एक करोड ५६ लाख रुप्या खर्च करके राइस मिल सञ्चालनमे ल्यानल बा ।

धनगढीमे रहल सहकारीसे गोदावरी नगरपालिका–८ मजगाउँमे राइस मिल सञ्चालन करल हो । मिलसे उत्पादित मोटा (ग्रेडिङ्ग) चाउर ओ मसिना चाउर बिक्री वितरण करे लागल बा । सहकारीसे कृषकके धान अपनही खरिद करके अपने ब्राण्डके चाउर उत्पादन करके बिक्री वितरण करे लागल सहकारीके अध्यक्ष देवबहादुर बम बटैलै । उहाँ सहकारीके टमान डिपोसहित भाटभटेनी सुपरमार्केटसे चामल बिक्री वितरण सुरु करल जानकारी डेलै ।

सहकारीसे यी वर्ष पाँच करोड ७२ लाख ८१ हजार रुप्या खर्च करके १६ हजार २८७ क्वीन्टल धान खरिद करले बा । हालसम एक हजार १८४ क्वीन्टल धान कुटाइ करके ६५१ क्वीन्टल चाउर उत्पादन करल शनिच्चरके रोज पत्रकार सम्मेलन करके जानकारी डेहल बा ।

राइस मिल रहल ठाउँहे अइना दिनमे औद्योगिक ग्रामके रुपमे विकास करटी लैजैना अध्यक्ष बम बटैलै । उहाँ अइना दिनमे गोहुँ, लाही, मसरी खरिद करके पिठा, तेल, दालसमेत उत्पादन कैना जानकारी डेलै ।

शेयर सदस्यके धान उचित मोलमे खरिद करके विशेष छुटमे शेयर सदस्यहुकनहे सक्कु १० सेवा केन्द्रसे चाउर विक्री कैना, शेयर सदस्यनहे प्रत्यक्ष वा अप्रत्यक्ष रुपमे उत्पालनसंग जोरके शेयर सदस्यके आर्थिक विकासमे टेवा पुगैना योजना रहल अध्यक्ष जनैलै ।

सहकारीसे कृषि उपआयोजना कार्यक्रम सञ्चालनके लाग मजगाउँमे डेढ बिघा जमिन खरिद करले बा । उ ठाउँमे राइस मिलसहित पाँच हजार टनके गोदामघरफे निर्माण करल बा । मिलमे प्रति घण्टा दुई मेट्रिकटन क्षमताके राइस मिल प्लान्ट जडान करल जनाइल बा ।

संस्थाके ३१औं बार्षिक साधारणससभा तथा बार्षिकोेत्सवके अवसरमे गैल अगहन ३० गते भुमि व्यवस्था सहकारी तथा गरिबी निवारण मन्त्री बलराम अधिकारी उ राइस मिल प्लाण्टके उदघाटन करल रहिट ।

नवजीवन सहकारी संस्था लिमिटेड वि.सं. २०४९ सालमे १७ जाहनसे मासिक रु १ एक जम्मा कैना करके सामुदायिक बचत कोषके रुपमे थालनी करल रहे । सहकारी ऐन २०४८ अन्तर्गत वि.सं. २०५० साल वैशाख १५ गते ६४ जानेसे रु. १० लाख ४० हजार पूँजीसे सहकारी विभागमे बहुउद्देश्यीय सहकारी संस्थाके रुपमे नवजीवन सहकारी संस्था दर्ता हुइल रहे । तत्कालिन अवस्थामे वि.सं. २०५० कुवाँर २० गते नेपाल राष्ट्र बैंकसे सिमित बैंकिङ्ग कारोवार कैना अनुमति प्राप्त कैना पहिल सहकारी संस्थाके रुपमे रहल रहे ।

वि.सं. २०५० अगहन ३० गतेसे यी संस्थासे विधिवत् रुपमे कारोबार सञ्चालन सुरु रहे । नेपाल भर अपन कार्यक्षेत्र रहल यी संस्थासे हाल कैलाली, कञ्चनपुर ओ बर्दियामे करके १० ठो सेवा केन्द्र सञ्चालन करटी रहल बा । संस्थासे लघुवित्त कार्यक्रमफे सञ्चालन करटी आइल बा जेम्ने ६१ समुहमे ८४४ महिला आवद्ध रहल बटै ।

संस्थासे शेयर सदस्य हितकोषसे संस्थाके सदस्यहे सुत्केरी स्याहार खर्च सुविधा, औषधि उपचार सुबिधा ओ किरीया खर्च सुबिधा उपलब्ध करैटी आइल बा ।

सहकारीके शेयर पुँजी ३१ करोड ३४ लाख २४ हजार ९ सय रहल बा । जगेडा कोष ४८ करोड ३३ लाख ९३ हजार ६३७ रुप्या, टमान कोषके जम्मा रकम ६ करोड २६ लाख ६४ हजार ४५९ रुप्या रहल बा ।

कुल बचतमे ५ अर्व ७ करोड ३६ लाख ४६ हजार ३०७ रुप्या, लगानीमे रहल कर्जा ४ अर्व १६ करोड १४ लाख ६० हजार ९२३ रुप्या रहल जनागिल बा । तरलता रकम १ अर्व ५५ करोड ८७ लाख ६१ हजार ६६८रुप्या रहल बा । तरलता प्रतिशत ३०÷७२, कुल शेयर सदस्य संख्या ३६ हजार ८१ जाने, कुल ऋणी संख्या ५१ सय ८१ जाने, कुल सम्पति ६ अर्ब ४७ करोड ९० लाख ३५ हजार ६८४ रुप्या ओ कुल संस्थागत पुँजी ५१ करोड ७ लाख ५७ हजार ६७९ रुप्या रहल बा ।