पोल्टी फार्मसे मासिक डेढ लाख आम्दानी
अर्जुन चौधरी/निशा राना
धनगढी, ११ चैत । कैलालीके धनगढी उपमहानगरपालिका वडा नम्बर ७ मनेहरा बैठना बीना चौधरी ओ हुकान गोसिया श्रीराम चौधरी पोल्टी फार्मसे मासिक डेढ लाख रुप्या कमैठै ।
स्थायी घर धनगढी उपमहानरपालिका वडा नम्बर १६ भादा रहल उहाँहुक्रे पहिले पहिले और व्यवसाय करिट । उहीसे सोचल जस्टे आम्दानी नैहुइलपाछे २०७५ सालसे पोल्टी फार्म संचालन करल उहाँहुक्रे बटैठै ।
चौधरी पोल्टी फार्म नाउँ धारके डेढ कटठामे ८ लाख रुप्या लगानी लगाके उ फार्म संचालन करल श्रीराम बटैठै । उहाँ कहलै, ‘पोल्टी फार्म सुरुवाट करबेर १५ सय चिङगनी डरले रही, ओइने ६ महिनापाछे अण्डा पारे सुरु करलै । एक फेरा चिङनी डरलेसे दुई बर्षसम अण्डा परठै ।’
पोल्टी फार्मसे उत्पादन हुइल अण्डा बजार माग अनुसार पुगाई नैसेकल श्रीराम बटैलै । पोल्टी फार्ममे अपन गोसिनीय विना चौधरीफे सहयोग करटी आइल उहाँ बटैलै । मासिक डेढ लाख ओ वार्षिक १८ लाख रुप्यासम आम्दानी कैना सफल हुइल संचालक चौधरी बटैलै ।
चिङगनी डारलपाछे ६ महिनामे अण्डा पारे सुरु करठै,’ उहाँ कहलै, ‘अण्डा विक्री करसेकलपाछे ओइने लगतार दुई बरससम अण्डा परठै । अण्डा पारे छोरलपाछे उहे मुरगी मासुके रुपमे विक्री हुइना करठै । उ मुरगी भोज, पार्टीमे ढेर माग हुइना करठै ।’
अब्बे अण्डा प्रतिगोटा १७ रुप्या ५० पैसा ओ प्रतिक्रेट ४२० रुप्या रहल उहाँ बटैठै । पोल्टी फार्मसे उत्पादन हुइना अण्डा बर्षायाममे निर्यात कैना गाह्रो हुइना ओ गर्मी महिनामे मुरगीमे रानीखेत रोग लागके अण्डा कम परना समस्या रहल फार्मके संचालक श्रीराम बटैलै ।
फार्मके आम्दानीसे नास्ता व्यावसायफे संचालन करल ओ फार्मसे निकरल मलसे कृषिमे प्रयोगमे आइल उहाँ बटैलै । फार्मके लाग चिङगनी चितवन ओ दाना राजपुरके ल्यानल उहाँ बटैलै ।
उहाँ कहलै, ‘अपनही निजि व्यावसाय संचालन करले बटी, जेम्ने हम्रे निर्धक्क हुके गोसिया, गोसिनीय काम करठी । हमार उत्पादन करल अण्डा ओ मासु विक्री कैना कौनो कर्रा नैहो । बजार माग अनुसार पुगाई नैसेकठुई ।’
पोल्टी व्यावसायमे सन्तुष्ट रहल बटैटी और कामके खोजी करे नैपरल संचालक श्रीराम बटैठै ।
(प्रशिक्षार्थी पत्रकार, बीए सातौं सेमेस्टर, कैलाली बहुमुखी क्याम्पस धनगढी कैलाली)
