हाफ म्याराथनके विजेता नगद ७५ हजार पैना
पहुरा समाचारदाता
धनगढी, ११ चैत । धनगढी जेसिजसे संचालन हुइना एघारौं संस्करणके धनगढी हाफ म्याराथन प्रतियोगिताके विजेता यी बरस ७५ हजार नगद पैना जनागिल बा ।
धनगढी जेसिजसे सोम्मारके रोज पत्रकार सम्मेलनके आयोजना करके उ जानकारी डेहल हो । धनगढी जेसिजसे २०१४ से नयाँ बर्षके अवसरमे धनगढीके समग्र विकासके लाग ‘अब धनगढी दौडिन्छ’ कना नाराके साथ एघारौं संस्करणके धनगढी हाफ म्याराथन प्रतियोगिता २०२५ वैशाख १ गते २०८२ सालमे आयोजना करेक लाग तयारीमे जुटल पत्रकार सम्मेलनमे जेसिजके संयोजक तथा कार्यकारी उपाध्यक्ष दिपक गौतम जनैलै ।
धनगढी हाफ म्याराथनके गत बर्षके दशौं संस्करणसे नेपाल एथलेटिक्स संघसे स्वीकृत प्राप्त करल कारण हाफ म्याराथनमे रेकर्ड बनल यकर रेकर्डसेफे मान्यता पैही ।
प्रतियोगिताके मुख्य आकर्षणके रुपमे रहल धनगढी हाफ म्याराथन धनगढी रंगशालासे सुरु हुके गेटा मेडिकल कलेजके मनेहरा पुलके मोड हइटी फेरसे धनगढी रंगशालामा पुगके समापन हुई । हाफ म्याराथनके विजेतासे नगद ७५ हजार, उपविजेता नगद ५० हजार ओ टिसरा हुइना नगद २५ हजार प्राप्त कैना जनागिल बा । प्रतियोगिता अन्तर्गत महिलाओर ओ कर्पोरेट, सञ्चारके ५ किलो मिटरके दौडफे आयोजना कैना बा । दुनु विधाके विजेता नगद ७ हजार ५०० उपविजेता नगद ५,००० ओ टिसरा हुइना नगद २ हजार ५ सय प्राप्त करही ।
प्रतियोगितामे सहभागीताके लाग टमान स्थानमे धमाधम फाराम वितरण हुइटी रहल जनागिल बा ।
