कैलारीमे एक महिने पावर टिलर मर्मत तालिम सुरु

पहुरा समाचारदाता
हसुलिया, १२ चैत । कैलारी गाउँपालिका वडा नम्बर १ हसुलियामे एक महिने पावर टिलर मर्मत तालिम सुरु हुइल बा । सिप सिकौ, आत्मनिर्भर बनौ कना मुल नाराके साथ अध्यक्ष स्वरोजगार कार्यक्रम अन्र्तगत कैलारी गाउँपालिकाके सहयोग तथा कैलाली एकिकृत उत्थान कार्य सञ्जाल नेपाल (किरण नेपाल)के आयोजनामे चैत १२ गतेसे बैशाख १२ गतेसमके लाग एक महिने तालिमके सुरुवाट हुइल हो ।

किरण नेपालके अध्यक्ष अमृतचन्द्र चौधरीके अध्यक्षतामे हुइल कार्यक्रममे उहाँ अब्बे घर घर पावर टिलर रहल मने विग्र्ेबेर प्राविधिक नैमिल्ना ओरसे प्राविधिक जनशक्ति उत्पादन करटी वेरोजगार यूवाहे रोजगारी सृजना करेक लाग पावर टिलर मर्मत तालिमके आयोजना करल बटैलै ।

कार्यक्रमके प्रमुख अतिथि कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी मनैनके जीवनहे सार्थक बनाइक लाग सीप आवश्यक रहल बटैलै । सीप रहलेसे कुहीहे वेरोजगार हुके बैठे नैपर्ना उहाँ बटैलै । यहाँ सीप सिख्ना ओ रोजगारी पैना सहजुल हुइलफे वडा अध्यक्ष बटैलै ।

वडा नम्बर ८ के वडा अध्यक्ष तारामल कठरिया कैलारी गाउँपालिकासे तालिमके लाग ढेर बजेट खर्च करसेकल ओरसे यूवाहुकनहे तालिम लेहे ओकर सदुपयोग कैना आग्रह करलै ।

किरण नेपालके सस्थापक तथा सल्लाहकार मनिराम बखरिया सीप रहलेसे कौनोफे ठाउँमे जाके रोजगारी करे सेक्ना बटैलै । गाउँ घरके ढेर जनसंख्या कृषि क्षेत्रमे आधारित हुइल ओरसे प्रत्येक घर पावर टिलर हुइल ओरसे प्राविधिक ज्ञान हुइना आवश्यक रहल बटैलै ।

कार्यपालिका सदस्य सुनिला चौधरी पहिले पहिले पैसा तिरके तालिम लेना बाध्यता रहल मने अब्बे स्थानीय तहके सहयोगमे निशुल्क तालिम सिखे पैना अवसर प्राप्त हुइल बटैली । यूवाहुक्रे विदेश जाके अलपत्र परल टमान घटना सुनल ओरसे सिखल सीपके सदुपयोग करलेसे स्वदेश विदेश जाहाफे काम लग्ना बटैली ।

वडा नम्बर ३ के वडा सदस्य किसुनलाल चौधरी प्रत्येक व्यक्तिके हातमे कौनो ना कौनो सीप हुइना आवश्यक रहल बटैलै । गाउँघरके यूवाहे सीप सिखाके अपने गाउँठाउँमे रोजगारी सृजना करेक लाग यी तालिम आयोजना करल ओ प्रशिक्षकहे आपन जानल सीप मजासे सिखाडेना आग्रह करलै ।

वडा नम्बर ४ वडा सदस्य मोहनलाल चौधरी सीप विना मानव जीवन अधुरा रना बटैलै । सीपके सदुपयोग करके आम्दानीके स्रोत बह्राई सेक्नाफे उहाँ बटैलै ।

कार्यक्रममे स्वागत मन्तव्य किरण नेपालके उपाध्यक्ष मिरा महतो ओ संचालन सचिव मुकेश बखरिया करल रहिट । तालिम उदघाटन कार्यक्रममे किरण नेपालके संस्थापक नारायण बखरिया,प्रशिक्षक अशोक चौधरी, हरि प्रसाद चौधरीलगायत किरण नेपालके प्रतिनिधिहुकनके सहभागिता रहे । तालिममे सक्कु वडासे दुई÷दुई जानेक सहभागिता रहल जनागिल बा ।