खाद्य÷दाना सम्बन्धी नयाँ ऐन नियम मापदण्डबारे अन्तरक्रिया
पहुरा समाचारदाता
धनगढी, १३ चैत । खाद्य÷दाना सम्बन्धी नयाँ ऐन नियम मापदण्डबारे सरोकारवालासंग अन्तरक्रिया कैगिल बा ।
खाद्य प्रविधि तथा गुण नियन्त्रण कार्यालय कैलालीके आयोजनामे वरिष्ठ खाद्य अनुसन्धान अधिकृत हरेराम प्रधानके अध्यक्षतामे हुइल कार्यक्रममे प्रमुख अतिथि जिल्ला प्रशासन कार्यालय कैलालीके प्रमुख जिल्ला अधिकारी गोगनबहादुर हमाल रहिट । कार्यक्रममे सम्बोधन करटी उहाँ मानव स्वास्थ्यसंग जोरल बाटमे व्यवसायी होए वा उपभोक्ता होए विशेष ध्यान डेहे पर्ना बटैलै । ऐनमे व्यवस्थाहे कार्यान्वयन छोट होए भारी व्यवसाय सबजाने पालना करे पर्ना उहाँ बटैलै ।
कैलाली कञ्चनपुरमे भारतिय सिमानाकासे जोरल कारण चोरी पैठारी ढेर हुइना ओरसे म्याद गुजरल, लेवल नैटाँसल बस्ती विक्री बह्रल कहटी स्थानीय तहसे अनुगमन कैना जरुरी रहल उहाँ बटैै ।
सहरी क्षेत्रसेफे ग्रामीण भेगमे लेवल नैरहल, म्याज गुजरल बस्तु ढेर विक्री हुइल ओरसे जे जहाँ पत्ता वहाँसे सूचना डेना प्रजिअ हमाल आग्रह करलै । उहाँ कहलै, ‘हमार उद्देश्य व्यवसाय प्रवद्र्धन कैना हो । केक्रो व्यवसायीहे धराप पर्ना मेरिक अनुगमन कैना नैहो मने कोई छोट व्यवसायी हो वा भारी व्यवसायी हो गलत करल कलेसे ओइनहे बराबर कानून लागी ।’
कार्यक्रममे खाद्य प्रविधि तथा गुण नियन्त्रण कार्यालयके प्रमुख वरिष्ठ खाद्य अनुसन्धान अधिकृत हरेराम प्रधान खाद्य स्वच्छता तथा गुणस्तर ऐन २०८१ बारे जानकारी डेहल रहिट ।
खाद्य अनुसन्धान अधिकृत सुमन लामिछाने खाद्य प्रविधि तथा गुण नियन्त्रण कार्यालय धनगढीसे सञ्चालन करल गतिविधिबारे जानकारी डेहल रहिट ।
यी आर्थिक बर्षमे ८ ठो खाद्य सम्बन्धी ओ १४ ठो दाना सम्बन्धी मुद्दा दायर करल उहाँ बटैलै । अन्य १५ ठो कैफियत प्राप्त हुइलहुकनके प्रक्रियामे रहल बटैलै । मुद्दा दायर हुइलमे जिल्ला प्रशासन कार्यालयमे १९ ठो, कैलाली जिल्ला अदालतमे २ ओ कञ्चनपुर जिल्ला अदालतमे १ ठो मुद्दा दायर हुइल उहाँ जनैलै ।
८ लाख ९ हजार ६३ रुप्याके नष्ट कैगिल बा । ओम्ने दाल, मसला, अखाद्य रंग, कोला, मिठाई, सस, सुजि, मह, चाउर, दुध आदि रहल उहाँ जनैलै । उ बस्तु दुषित, उपभोग्य मिति सेकल, खाद्य स्वच्छता कायम नैकरल, मिसावट पाइल कारण नष्ट करल उहाँ जनैलै ।
खाद्य प्रविधि तथा गुण नियन्त्रण कार्यालय धनगढीसे खाद्य÷दाना स्वच्छता तथा गुणस्तर नियमन, प्रयोगशाला सेवा, खाद्य प्रविधि विकास तथा तालिम, खाद्य पोषण सम्बन्धी अध्ययन करटी आइल खाद्य अनुसन्धान अधिकृत सुमन लामिछाने बटैलै । ओस्टेक खाद्य तथा दाना अनुमति पत्र सिफारिस, जारी तथा नविकरण, अनुगमन तथा निरिक्षण, सेवाग्राहीहे प्राविधिक परामर्श प्रदानफे करटी आइल उहाँ जनैलै ।
कार्यक्रममे किराना व्यवसायी संघके उपाध्यक्ष दुर्गा कुश्मी, कैलाली उद्योग वाणिज्य संघके उद्योगतर्फके उपमध्यक्ष दिनेश लम्साल, व्यवसायी धनबहादुर चौधरी, भुपेन्द्र थापालगायत आपन जिज्ञासा राखल रहिट । कार्यक्रमके संचालन खाद्य प्रविधि तथ गुण नियन्त्रण कार्यालयके तोयानाथ ओझा करल रहिट ।
