थारु अगुवा बिच छलफल

पहुरा समाचारदाता
धनगढी, १३ चैत । कैलालीके थारु अगुवा समाजसेवी बुद्धिजिवीहुक्रन बिच सुझाव संकलन तथा छलफल हुइल बा ।

थारु आयोग अन्तर्गत थारु समुदायके बलिदानीके इतिहास दस्तावेजीकरणके लाग बुधके रोज धनगढीमे छलफल हुइल हो । बातचित घरके बरघर ठाकुर करिया प्रधानके घरगोसियाइमे हुइल कार्यक्रमके बर्का पहुना लेखक तथा साहित्यकार डा. कृष्णराज सर्वहारी रहल रहिट ।

उहाँ सामाजिक, राजनीतिक योगदान डेहल थारु योद्धाहुक्रनके इतिहास दस्तावेजीकरण तथा लेखन तयारीके लाग सुझाव संकलन तथा छलफल करल बटैलै । ओकर लाग उहाँ पश्छिउ कञ्चनपुरसे लेके पुरुब झापासम थारु अगुवा, समाजसेवी, वुद्धिजिवीहुक्रनसे भेटघाट तथा छलफल कैना जनैलै ।

छलफल कार्यक्रममे थाकसके केन्द्रीय पार्षद खडक बहादुर चौधरी, फूलमति चौधरी, थाकस कैलालीके पूर्व सभापति माधव चौधरी, थाकस धनगढी नगर समितिके सुर्या चौधरी, अधिवक्ता जोहारीलाल चौधरी, सर्जु चौधरी, थरुहट नेता खडक चौधरी, थारु टिभीके कुन्नु नारायण चौधरी, गायक राजुराज चौधरी, नगर भलमन्साके सचिव विन्तीराम चौधरी, लगायतके उपस्थिति रहल रहे ।