पोषण क्षेत्रमे ढेर सूचक पुरा हुइल बाः गापा अध्यक्ष
पहुरा समाचारदाता
हसुलिया, १४ चैत । कैलारी गाउँपालिकाके अध्यक्ष राजसमझ चौधरी पोषणके क्षेत्रमे ढेर सूचक पुरा करल बटैले बा ।
गाउँपालिका स्तरीय पोषण तथा खाद्य सुरक्षा निर्देशकके संयोजक समेट रहल उहाँ पोषण तथा खाद्य सुरक्षा निर्देशक समितिके विफेक रोज हसुलियामे बैठकमे उहाँ बाट बटवाइल रहिट ।
गाउँपालिकाके साझेदारी तथा समन्वयमे संघ संस्थासे पोषणके क्षेत्रमे टमान मेरिक गतिविधि संचालन करले बा,’ उहाँ कहलै, ‘उपलब्धी हासिल करलेक टमान शाखा ओ वडा कार्यालयसे समन्वय करके गैलेसे ठप उपलब्धीमुलक बनाई सेक्जाई ।
ओस्टेक उहाँ वडा कार्यालयहे पोषणके क्षेत्रमे हुइना गतिविधिहे समन्वय करके आघे बह्रना निर्देशन डेहल रहिट ।
महिला, बालबालिका ओ किशोरीहुकनके पोषण अवस्थामे सुधार कैना बहुक्षेत्रीय अभ्यासहे संस्थागत कैना स्थानीय तहके नीति, योजना कार्यक्रम ओ सेवा प्रवाहमे सुधार करके पोषणमैत्री स्थानीय शासन प्रद्धतिके अवलम्वन करेक लाग पोषण परियोजना संचालन हुइल बा ।
कार्यक्रममे कैलारी गाउँपालिकाके स्वास्थ्य शाखा प्रमुख नरेशकुमार चौधरी पोषण तथा खाद्य सुरक्षाके क्षेत्रमे गाउँपालिकामे हुइल गतिविधिबारे जानकारी डेहल रहिट ।
कार्यक्रममे याक नेपालके पोषण परियोजनाके कार्यक्रम संयोजक जगत उपाध्यक्ष उ परियोजनासे करल गतिविधिबारे प्रस्तुतीकरण करल रहिट ।
सहास नेपालके लिफट परियोजना संयोजक सौरभ भण्डारी, नवजीवन सेवा संघके फिल्ड संयोजक प्रमिन्द्रमान श्रेष्ठ ओ सामुदायिक विकास केन्द्र डोटीके करुणा चौधरी पोषणके क्षेत्रमे कैगिल गतिविधिहे समेटके प्रस्तुतीकरण करल रहिट ।
कैलारी गाउँपालिकाके कृषि शाखा प्रमुख मैया चौधरी गाउँपालिकाके पोषण क्षेत्रहे टेवा पुग्ना मेरके विउविजन वितरण करल बटैली ।
कार्यक्रममे केयर नेपालके पदम लम्साल, हरि ढकाललगायतसे कैलारीमे पोषणके क्षेत्रमे उपलब्धीमुलक कार्यक्रम हुइल बटैलै ।
कार्यक्रम कैलारी गाउँपालिकाके आयोजनामे केयर नेपाल, याक नेपाल सहास नेपाल, सामुदायिक विकास केन्द्र डोटीके सहकार्य ओ समन्वयमे हुइल रहे ।
कार्यक्रममे गाउँपालिका उपाध्यक्ष भगवतीकुमारी चौधरी, वडा अध्यक्षहुक्रे, प्रमुख प्रशासकीय अधिकृत खगेन्द्रराज जोशी, सामाजिक विकास शाखा प्रमुख यगम कलेल, शिक्षा शाखा प्रमुख गणेश प्रसाद मिश्र, योजना शाखा प्रमुख सन्तोषकुमार चौधरी, कृषि शाखालगात टमान शाखाके प्रमुख, कार्यपालिका सदस्यहुकनके सहभागिता रहे । कार्यक्रम संचालन स्वास्थ्य शाखा प्रमुख नरेशकुमार चौधरी करल रहिट ।
