रामपुर कटैनी पुलके लाग बजेट सुनिश्चित

पहुरा समाचारदाता
धनगढी, १४ चैत । कैलालीके कैलारी गाउँपालिका वडा नम्बर ७ रामपुर कटैनी पुलके लाग बजेट विनियोजन करल बा । उ पुलके लाग सुदूरपश्चिम प्रदेश सरकारसे ९ करोड ७१ लाख बजेट सुनिश्चित करल हो । पुल निर्माणके लाग बजेट सुनिश्चित हुइलपाछे यहाँके स्थानीय खुशी हुइल बटै ।

गाउँपालिकाके प्रवक्ता एवं वडा नम्बर ७ के अध्यक्ष दिपेन्द्र बहादुर बम पुल निर्माण हुई टे वडाबासीके सयौँ वर्षके सपना पुरा हुइना बटैलै । पुलके लाग बजेट सुनिश्चित हुइलपाछे वडा अध्यक्ष बम वडावासी, स्थानीय तथा प्रदेश सरकारहे धन्यवाद डेले बटै । उहाँ सुदुरपश्चिमके मुख्यमन्त्री कमलबहादुर शाह, पूर्वमन्त्री प्रकाश बहादुर देउवा, अर्थमन्त्री बहादुर थापा, प्रदेश सभा सदस्य घनश्याम चौधरी, भौतिक सचिव सुरत बम, भौतिक पूर्वाधारके प्रमुख रामचन्द्र खत्री, कैलारी गाउँपालिकाके प्रमुख राजसमझ चौधरी ओ उपप्रमुख भगवतीकुमारी चौधरी लगायत सक्कु सहयोगीहे धन्यवाद व्यक्त करल हुइट ।

अध्यक्ष बम पुलके बहुबर्षिय ठेक्का अनुसार निर्माणके कार्य हुइना कहटी दुई तीन वर्षभिटर निर्माण सम्पन्न हुइना बटैलै । उहाँ कहलै, ‘रामपुर कटैनी लडियामे बन्ना पुलके लाग श्रोत सुनिश्चित हुइल अवस्था बा । यी पुलके बहुबर्षिय ठेक्का अनुसार काम हुई, दुई तिन बर्षमे पुलके सक्कु निर्माणके कार्य सम्पन्न हुई ।’

लडियामे पुल नैहुके खास करके बर्खाके बेला रामपुर, भुँइयाँफाटा, तिघरी लगायतके स्थानीयहे ओहोरदोहोर कैना बहुट समस्या रहठ । उ ठाउँमे पुल निर्माणके लाग बिगत नम्मा समयसे यहाँके स्थानीयस माग करटी आइल रहिट । बर्खाके बेला लडियामे अइना बाढसे काठेपुल पुहाके यहाँके स्थानीयहे झन सास्ती खेपे परल बा । यहोर छटकपुर ओ बर्का बसन्ता कटैनी लडियामे पक्की पुल नैहुके छटकपुर ओ बर्का बसन्ता सहित नारायण ओ मोहनपुरके स्थानीयहेफे ओहोरदोहोर कैना बहुट समस्या हुइना करल बा । अध्यक्ष बम बर्का बसन्ता कटैनी पुलके लागफे पक्कीपुल निर्माणके लाग पहल हुइटी रहल बटैलै ।