नमस्ते सहकारीके कर्मचारी, शेयर सदस्य पदाधिकारी ओम आशा ओ संंन्जीवनी अस्पातलमे उपचारमे छुट पैना

पहुरा समाचारदाता
धनगढी, १४ चैत । नमस्ते सहकारीसे कर्मचारी, शेयर सदस्य पदाधिकारीनहे उपचारमे धनगढीके दुई अस्पतालमे छुट डेना कहिके सम्झौता करले बा । ओम आशा अस्पताल प्रालि ओ संजिबनी अस्पताल प्रालिमे उपचारमे छुट डेना कहिके विफेक रोज दुई पक्षिय सम्झौता हुइल बा ।

सम्झौतामे नमस्ते सहकारीसे कर्मचारी, शेयर सदस्य पदाधिकारीन आबसे ओम आशा अस्पताल प्रालिमे उपचार करेबेर ओपिडि, ल्याव, बेड भर्ना, एक्सरे ओ शल्यक्रियामे १०÷१० प्रतिशत छुट पैना जनागिल बा ।
उ अस्पतालमे सेवा लेहे गैल विमारी सहकारीके परिचयपत्र पेश करलेसे छुट मिल्ना ओम आशा प्रालिके संचालक भुपेन्द्र चौधरी बटैलै । सम्झौतापत्र हस्तान्तरण अस्पतालके ओरसे संचालक भुपेन्द्र चौधरी, सहकारीके प्रवन्धक विजय चौधरीविच कैगिल रहे । साक्षीमे अस्पतालके ओरसे डा. राजीव चौधरी, सहकारीके ओरसे दशिराम चौधरी रहल रहिट ।

ओस्टेक करके धनगढी उपमहानगरपालिका–५ हसनपुरमे रहल संन्जीवनी अस्पताल प्रालिसे नमस्ते सहकारीसे कर्मचारी, शेयर सदस्य पदाधिकारीनहे उपचारमे छुट डेना सम्झौता करले बा ।
उ अस्पतालसे कल्सन्ट ओपिडी÷इमारजेन्सी ओपिडीमे २५ प्रतिशत, मेजर÷माइनर ओटिमे १५ प्रतिशत, ल्याव÷इसिजी÷एक्सरेमे १५ प्रतिशत, यूसिजी÷इसिएचओ १० प्रतिशत, वेड चार्ज÷आइसियू वेडमे १५ प्रतिशत ओ फार्मेशीमे ५ प्रतिशत छुट डेना सम्झौता हुइल बा ।
उ अस्पतालमे सेवा लेहे गैल विमारी सहकारीके परिचयपत्र पेश करलेसे छुट मिल्ना ओम आशा प्रालिके प्रवन्धक रविन उपाध्याय बटैलै ।
सम्झौतापत्र हस्तान्तरण संन्जीवनी अस्पतालके ओरसे प्रवन्धक रविन उपाध्याय ओ सहकारीके प्रवन्धक विजय चौधरीविच कैगिल रहे । साक्षीमे अस्पतालके ओरसे सन्तोष चौधरी, सहकारीके ओरसे ठाकुर प्रसाद करियाप्रधान रहल रहिट । सम्झौतापत्र हस्तान्तरण कार्यक्रममे नमस्ते बचत तथा ऋण सहकारी संस्थाके अध्यक्ष जगतराम चौधरीलगायत पदाधिकारीहुकनके सहभागिता रहे ।
