जिर्ण घुरहा पुलके मर्मत सुरु

पहुरा समाचारदाता
धनगढी, १५ चैत । कैलालीके कैलारी गाउँपालिका–४ ओ ६ जोरना घुरहा लडियक पुल किनारमे मर्मतके काम सुरु हुइल बा । प्रदेश सरकारके बजेटमे विफेक पुलके पुरुवा किनार मर्मतके काम सुरु करल हो ।

पुल किनारमे मर्मतके लाग प्रदेश सरकारसे ५० लाख रुप्या बजेट छुट्याइल बा । प्रदेशके बजेटसे मर्मतके काम सुरु हुइल वडा नम्बर ४ के वडाध्यक्ष ठागुराम चौधरी जानकारी डेलै ।

लडियामे बहाव परिवर्तन करलपाछे कुछ वर्ष आघे पुलके पूर्व ओर किनारमे सडक भस्नाके साथे भ्वाङ परल रहे । यी आघे काम चलाउ टालटुल करल रहे । यी बार आरसिसीसहितके मर्मत कार्य हुइना वडाध्यक्ष चौधरीके कहाई बा ।

पुल किनारमे सडक भस्नाके साथे भ्वाङ परलपाछे दुर्घटनाके जोखिम बा । उ पुल हुके भारी सवारी साधन ओहोरदोहोर हुइ नैसेकठ । मोटरसाइकल, साइकल ओ पैदलयात्री केल ओहोरदोहोर कैना करल बटै ।