कैलारीके ३ सय ९१ सुत्केरी महिलाहे पोषण सामाग्री उपहार

पहुरा समाचारदाता
हसुलिया, १५ चैत । कैलाली जिल्लाके कैलारी गाउँपालिकास्थित टमान वडाके ३ सय ९१ जाने सुत्केरी महिलाहुकनहे पोषण सामाग्री डेगिल बा ।

उपाध्यक्ष समावेसी पोषण कार्यक्रम अन्र्तगत कैलारी गाउँपालिकाके वडा नम्बर २, ३, ५, ६, ८ ओ ९ वडामे एक बरस भिटरके सुत्केरी महिलाहुकनहे पोषण सामाग्री वितरण कैगिल कैलारी गाउँपालिका स्वास्थ्य शाखा प्रमुख नरेशकुमार चौधरी जानकारी डेलै ।

उपाध्यक्ष समावेसी पोषण कार्यक्रम अन्र्तगत थारु महिला संजालसे वडामे रहल स्वास्थ्य संस्थाके सहकार्यमे सुत्केरी महिलाहुकनहे पोषण सामाग्री वितरण करल उहाँ जनैलै ।

कैलारी गाउँपालिका वडा नम्बर २ मे ४६ जनहन, वडा नम्बर ३ मे १०४ जनहन, वडा नम्बर ५ मे ३९ जनहन, वडा नम्बर ६ मे २६ जनहन, वडा नम्बर ७ मे ५५ जनहन, वडा नम्बर ८ मे ६८ जनहन ओ वडा नम्बर ९ मे ५१ जनहनमे पोषण सामाग्री वितरण करल स्वास्थ्य शाखा प्रमुख नरेशकुमार चौधरी बटैलै । उहाँ कहलै, ‘थारु महिला संञ्जालसे सम्बन्धित वडाके स्वास्थ्य संस्थासे उपलब्ध कराइल तथ्याङक अनुसार पोषण सामाग्री हस्तान्तरण कैगिल हो ।’

कैलारी गाउँपालिका भिटरके स्वास्थ्य संस्थामे गर्भवती हुइल बेलासे गर्भ चेकजाँचसे लेके वडास्थित बर्थिङ सेन्टरमे बच्चा जल्मुइया एक बरस भिटरके (लरकोरुइया) सुत्केरी महिलाहुकनहे पोषण सामाग्री वितरण कैगिल उहाँ जनैलै ।

गाउँपालिका उपाध्यक्ष भगवतीकुमारी चौधरी ‘उपाध्यक्ष समावेशी पोषण कार्यक्रम’ अन्र्तगत पोषण सामाग्री वितरण करेपाके खुशी लागल बटैली ।

उहाँ कहली, ‘एक ठो लरकोरया डाई जब बच्चा जल्मा सेकलपाछे उहीहे पोषण तथा सरसफाई सबसे ढेर आवश्यक रहल ओरसे यी सामाग्री वितरणपाछे डाई बच्चाके पोषण तत्वमे सहयोग पुग्नाके साथे स्वास्थ्य क्षेत्रमेफे राहत पुगी । पोषण सामाग्रीसे डाई ओ बच्चाहे फाईदा पुग्ना ओरसे सामाग्री हस्तान्तरण करल हो । लरकोरया डाई पोषण युक्त खाना खैले प्रयाप्त मात्रमे दुध अइना ओ उहीहे बच्चनहे कुपोषणसे बचैना मद्दत पुग्न उहाँ बटैली ।

यिहीसे आघे यी कार्यक्रम नैरहल मने अपनेहुक्रे जनप्रतिनिधिके रुपमे आइलपाछे महिलाके पीडा बुझके यी कार्यक्रम ल्यानल उपाध्यक्ष बटैली । एक बरसके सुत्केरी महिलाहुकनके पोषण सामाग्री वितरण करटी रहल यी कार्यक्रम असौ टिसरा बरस रहल उहाँ जनैली ।

सुत्केरी महिलाहुकनके पोषण सामाग्रीमे चना एक किलो, केराउ एक किलो, भटमास आधा किलो, टुथपेस्ट, व्रस, नोह कटनी, वेवी सोप, वेवी क्रिम, लगैना तेल एक÷एक पिस, घिउ आधा किलो, किसमिस, बदाम, एक÷एक प्याकेट, प्याड, झोलासहित वितरण कैगिल थारु महिला संजालके आरती चौधरी बटैली ।

कैलारी गाउँपालिका वडा नम्बर २ शुकके रोज पोषण सामाग्री वितरण कार्यक्रममे हुइल रहे । संजालके कैलारी गाउँपालिका अध्यक्ष कृष्णी चौधरीके अध्यक्षतामे हुइल कार्यक्रममे कैलारी गाउँपालिका स्वास्थ्य शाखा प्रमुख नरेशकुमार चौधरी प्रमुख अतिथि रहल रहिट ।

कार्यक्रममे सम्बोधन करटी उहाँ एक ठो लरकोरया डाईहे आपन बच्चाहे प्रयाप्त मात्रमे दुध डेना ओ स्वास्थ्य राखेक लाग पोषणयुक्त खानाके साथे हाइजिनिक किटबक्ड अनिवार्य रहे पर्ना बटैलै । डाई मने स्वास्थ्य नैरहलेसे बच्चाहे स्वास्थ्य धारे नैसेक्ना कहटी सुत्केरी अवस्थामे आउर ढेर खानापान ओ स्वास्थ्य सरसफाई ध्यान डेहे पर्ना बटैलै ।

कार्यक्रममे विशिष्ट पहुना वडा नम्बर २ के वडा सदस्य सन्तराम चौधरी, वडा सदस्य राजकला खनाल, बसौती स्वास्थ्य चौकीके सल्लाहकार संयोजक नविन कुमार बोहरालगायत रहल रहिट ।

कार्यक्रमके संचालन संजालके सचिव अनिता चौधरी बोहरा करल रहिट । कार्यक्रममे संजालके गीता चौधरी, अनिता चौधरी, मञ्जु चौधरी, पोषण सहजकर्ता प्रियंका चौधरीलगायतके सहभागिता रहे ।