धनगढी एफसी समर्थकके लाग फ्यान पार्कके व्यवस्था कैना

पहुरा समाचारदाता
धनगढी, १५ चैत । एनसेल नेपाल सुपर लिग (एनएसएल) के फ्रेन्चाइज टोली धनगढी फुटबल क्लबसे गृह नगरमे आपन समर्थके लाग फ्यान पार्कके व्यवस्था कैना हुइल बा । नेपाली फुटबलके फ्रेन्चाइज प्रतियोगिता एनएसएलके तेस्रो संस्करण शनिच्चरसे शुरु हुइटी बा । धनगढी चैत १९ गते मंगरके बुटवल लुम्बिनीसँग खेलके प्रतियोगिताके प्रारम्भ कैटी बा ।

गृहनगरमे रहल धनगढी एफसीके समर्थकहुक्रे धनगढी स्थित पार्क मोडमे जोके बरवार स्क्रिनमे आपन टोलीके खेल हेरे पैना हुइल बाटै । धनगढी एफसीसे धनगढी उपमहानगरपालिकासँग मिलके पार्क मोडमे फ्यान पार्क निर्माण करे लागल हो । धनगढी उपमहानगरपालिकासँगके सहकार्यमे फ्यान पार्कके व्यवस्था करे लागल धनगढी एफसीके सुवास शाही बटैलै । ओहकान अनुसार फ्यान पार्कमे म्युजिक कार्यक्रम, फुड स्टल ओ फ्यान कन्टेस्ट फेन राखजैना बा ।

‘धनगढी एफसीके घरेलु समर्थक आपन टोलीके सम्पूर्ण खेल फ्यान पार्कमे जाके हेरे सेकही । इहीसे काल्हके दिनमे एनएसएल होम एन्ड अवे प्रणालीमे गैल खण्डमे हमार समर्थकके आपन टोलीके खेल हेरक लाग गृहनगरमे तयार होसेक्ना बाटै,’ शाही कहलै, ‘सुदुरपश्चिम भर हम्रे यी माहोल तयार कैटी बाटी । धनगढी एफसी फ्यान कल्चर निर्माण कैना प्रतिवद्ध बा ।’

देवेन्द्र तामाङ कप्तान ओ कीर्तिसरत्न छुन्जु मार्की खेलाडी रहल धनगढी मंगरके ६ बजे बुटवल लुम्बिनीसँग खेल्ना बा । अशोक खबास, अमृत श्रेष्ठ, प्रशान्त लक्सम लिम्बु, जर्जप्रिन्स कार्कीलगायतके धनगढीके खेलाडी आपन समर्थके मन जिट्ना विश्वास हम्रे लेले बाटी । धनगढी एफसी पहिल दुई संस्करणके एनएसएलके उपविजेता टोली हो ।

धनगढी एफसी पाछेक संस्करणके फाइनलमे पुगेबर स्ट्राइकरद्वय अफिज ओलावा (नाइजेरिया) ओ अहमद हिजाजी (लेबनन) टोलीमे यथावत रहल बाटै । यी सिजनके लाग धनगढी एफसी स्पेनिस गोलरक्षक वालिड इसाफी ओ रक्षक जर्ज काइसेडो, मोरक्कोके डिफेन्सिभ मिडफिल्ड मोहम्मद इल जाउएनी ओ ब्राजिली विङगर सर्जियो बार्बोजाहे टोलीमे समावेश करल बा । टोलीके मुख्य प्रशिक्षकमे स्पेनिस हुँवा म्यानुएल मार्टिनेज रहल बटैं ।