सर्वांगीण अपांगता विकास समाजके आठौं साधारणसभा

अध्यक्षमे नन्दराज निर्वाचित, दुई पत्रकारसहित पाँच जाने सम्मानित

पहुरा समाचारदाता
धनगढी, १६ चैत । सर्वांगीण अपांगता विकास समाज नेपाल कैलालीके अध्यक्षमे नन्दराज भट्ट चयन हुइल बटै ।
शनिच्चरके रोज धनगढीमे सम्पन्न हुइल ८ औ वार्षिक साधारणसभा तथा चौथो अधिवेशनसे ११ सदस्य कार्य समिति सर्वसम्मत चयन करल हो ।

समितिके उपाध्यक्षमे मानबहादुर बस्नेत, महासचिवमे रामचन्द्र राना, सचिवमे चेतराज भट्ट ओ कोषाध्यक्षमे करिश्मा चौधरी रहल बटै । ओस्टेक करके सदस्यमे गणेश सिंह धामी, हरि कुमाल, फिरिया कुमारी चौधरी, सावित्री कार्की,उमा पोखरेल ओ जानकी लुहार रहल रहे ।

उहीसे आघे सर्वांगिण अपांगता विकास समाजके अध्यक्ष कृष्ण भण्डारीके अध्यक्षतामे हु्इल कार्यक्रममे विशिष्ट पहुना राष्ट्रिय मानव अधिकार आयोगके अधिकृत दैवज्ञराज न्यौपाने ओ गैसरकारी संस्था महासंघ कैलालीके अध्यक्ष चेतमान साउँद रहिट ।
कार्यक्रममे सम्बोधन करटी राष्ट्रिय मानव अधिकार आयोगके अधिकृत न्यौपाने अपांगता रहल व्यक्तिहुकनके अधिकारके लाग आयोग प्रतिबद्ध रहल बटैलै ।

ओस्टेक गैरसरकारी संस्था महासंघ कैलालीके अध्यक्ष साँउद अपांगता हुइल व्यक्तिहुकनके लाग राज्यसे आर्यआर्जनके कार्यक्रम ल्याने पर्नामे जोर डेहल रहिट । कार्यक्रममे अपांगता क्षेत्रके अभियान्त भीमबहादुर शाह, रुपा राई, पत्रकार कैलाश जोशी, भानुभक्त आचार्य ओ गगन अयडीलगायतसे शुभकामना मन्तव्य व्यक्त करल रहिट ।

यिहे विच ८ औं वार्षिक साधारणसभा तथा चौथो अधिवेशनके अवसरमे अपांगताके क्षेत्रमे कलम चलाइल वाफत कैलालीके दुई जाने पत्रकार सम्मानित हुइल बटै । कैलाली पत्रकार महासंघके कार्य समिति सदस्य एवं अत्तरियासे प्रकाशित हुइना अग्नी पोष्टके कार्यकारी सम्पादक कैलाश जोशी ओ नेपाल प्रेस अनलाईन कैलाली संवाददाता भानुभक्त आचार्य सम्मानित हुइल बटै ।