भारतिय चिहुरल ट्याक्टर दुर्घटनाः बालकके मृत्यु, २७ घाहिल

पहुरा समाचारदाता
धनगढी, १६ चैत । कैलाली जिल्लाके कैलारी गाउँपालिका वडा नम्बर ५ मन्कापुरमे भारतीय दर्शनार्थी चिहुरल ट्याक्टर दुर्घटना हुके एक बालकके मृत्यु हुइल बा । कलेसे २७ जाने घाहिल हुइल बटै । ओइने मन्से तीन जानेक अवस्था गम्भीर रहल बा ।

बेहडाबाबा मन्दिरके दर्शन करके लौटटी रहल भारतीय दर्शनार्थी चिहुरल नम्बर नैखुलल ट्याक्टर शनिच्चर दुपहर दुर्घटना हुइल इलाका प्रहरी कार्यालय हसुलिया जनैले बा ।

जिल्ला प्रहरी कार्यालयके प्रहरी निरीक्षक दर्शन खड्का दुर्घटनामे एक जानेक मृत्यु हुइल जनैलै । उहाँक अनुुसार ट्याक्टरमे सवार भारतके लखिमपुर खिरीके ११ वर्षीय बालक आयुश बर्माके मृत्यु हुइल बा ।

घाहिल अवस्थामे सेती प्रादेशिक अस्पताल पुगाइल बर्माहे चिकित्सकसे मृत घोषणा करल प्रहरी निरीक्षक खड्का बटैलै । अन्य तीन जाने गम्भीर घाहिल अवस्थामे बटै । घाहिल मध्ये १२ जानेक सेती प्रादेशिक अस्पताल ओ १५ जानेक धनगढीके निसर्ग हस्पिटलमे उपचार हुइटी रहल बा । ओइने मध्ये तीन जाने गम्भीर, १२ जाने मध्यम ओ १२ जाने सामान्य घाहिल रहल प्रहरीके कहाई बा ।