पहुराके पहुना सम्पादक ‘सर्वहारी’ सम्मानित
पहुरा समाचारदाता
दाङ, १७ चैत । पहुरा थारु दैनिकके पहुना सम्पादक तथा साहित्यकार डा. कृष्णराज सर्वहारी पुरस्कृत सहित सम्मानित हुइल बाटै ।
राप्ती साहित्य परिषद् दाङ शाखा आपन १७औं वार्षिकोत्सवमे डा. सर्वहारी सहित ६ जाने स्रष्टाहे पुरस्कृत सहित सम्मान करल बा । उहे कार्यक्रमके बिच शासासे बहुभाषिक काव्य उत्सव फेन करले बा ।
कृष्ण गायत्री प्रज्ञा पुरस्कारसे स्रस्टा डा. कृष्णराज सर्वहारी, यज्ञबहादुर बुढाथोकी स्मृति पुरस्कारसे स्रस्टा डा कृष्णराज डिसी, वेदवप्रसाद जयश्वरी रावत स्मृति पुरस्कारसे गायक प्रकाश रेग्मीहे नगद राशीसहित पुरस्कार प्रदान करल हो ।
ओस्टके, कार्यक्रममे विनोद पोख्रेल, पद्मप्रसाद शर्मा ओ राप्ती साहित्य परिषद् दाङ शाखाके निवर्तमान अध्यक्ष दीपक शर्मा ‘समीर’ हे सम्मान करल रहे । कार्यक्रमके बर्का पहुना राप्ती साहित्य परिषद्के संस्थापक अध्यक्ष नारायणप्रसाद शर्मा पुरस्कार तथा सम्मान प्रदान करल रहिट ।
बहुभाषिक काव्य उत्सव
कार्यक्रममे बहुभाषिक काव्य उत्सवके क्रममे सात भाषाके कविता प्रस्तुत करगैल रहे । जेम्ने उदय आले ओ निर्मला कुसुण्डा कुसुण्डा भाषामे, छविलाल कोपिला ओ राजकुमार कान्छा थारू भाषा, क्षितिज मगर ओ कमलप्रसाद गौतम मगर खाम भाषामे उत्तम खतिवडा ओ जनक पोखरेल संस्कृत भाषामे, नारायणप्रसाद श्रेष्ठ ओ योगमाया श्रेष्ठ नेपाल भाषामे, जगतराम यादव ओ बसन्तप्रकाश यादव अवधि भाषामे तथा नारायण नेपाल ओ शारदा शर्मा नेपाली भाषामे कविता वाचन करल रहिट ।
उहे अवसरमे कार्यक्रमके बर्का पहुना शर्मा अक्के मञ्चमे टमान भाषाके कविता प्रस्तुती अनुकरणीय रहल कहटी भाषा, कला ओ संस्कृति संरक्षणमे यी मेरके कार्यक्रमसे सहयोग कैना बटाइल रहिट ।
कार्यक्रममे साहित्यकार उत्तमकृष्ण मजगैँया, पुरुषोत्तम खनाल, डा टिकाराम उदासी, दीपक शर्मा ‘समिर’, डा कृष्णराज सर्वहारी, पदमप्रसाद शर्मा, खगराज न्यौपाने, शरद अधिकारी, डिल्लीराज श्रीधर, निमबहादुर थापा, प्रकाश रेग्मीलगायत शुभमन्तव्यसंगे रचना फेन बाचन करल रहिट ।
परिषद्के वार्षिक साधारणसभा समेत रहल उक्त कार्यक्रममे राप्ती साहित्य परिषद् दाङ शाखा सचिव घनश्याम केसी सांगठनिक तथा कोषाध्यक्ष सुशीला आचार्य आर्थिक प्रतिवेदन प्रस्तुत करल रहिट । उपाध्यक्ष सुरेशकुमार पाण्डेयके स्वागत, सचिव घनश्याम केसीसे कार्यक्रमके सहजीकरण तथा अध्यक्षता यम रेग्मीसे हुइल रहे ।
