एक हजार युवाहे सीपमूलक तालिम

पहुरा समाचारदाता
धनगढी, १७ चैत । प्रदेश स्वरोजगार कोषलगायतके टमान सरकारी–गैरसकारी संस्थाके साझेदारीमे धनगढी उपमहानगरपालिकासे आठ विधा अन्तर्गत २९ ठो सहायक विधामे सीपमूलक तालिम डेले बा । उपमहानगरपालिकासे रोजगार मेला आयोजना कैटी अक्केसंगे एक हजारसे ढेर युवाहे एकसाथ सीपमूलक तालिम डेहल हो ।

फागुन पहिल अँठ्वारसे चैत १५ गते संचालित पुरोहित तालिमसे डिजिटल मार्केटिङसमके तालिममे सुदूरपश्चिमके ३९ स्थानीय तहके ५३९ महिला ओ ५०१ पुरुष सहित १ हजार ४० युवा सहभागी रहल धनगढी उपमहानगरके रोजगार संयोजक चन्द्रबहादुर महरा बटैलै । ओहकान अनुसार धनगढीके खुलामञ्चमे आठ मुख्य विधाके २९ उपविधामे तालिम सञ्चालन करल हो ।

आर्ट एण्ड क्राफ्ट डिजाइनिङ विधा अन्तर्गत फेसन डिजाइनिङ तालिम अन्तर्गत फेसन डिजाइनिङ, एडभान्स टेलरिङ, सांस्कृतिक पोषाक निर्माण, बेतबाँस क्राफ्टरहस्तकलाके सामग्री निर्माणके तालिम सञ्चालन करल रहे । ‘सीप सिखके स्वरोजगार बन्ना धोको हो । अब्बे तालिम पैनु,’ बेतबाँसके सामग्री निर्माणके तालिम लेहल अछाम साँफेबगरके लक्ष्मी चन्द शाह कहली, ‘तालिमसे बेतबासके मुढा, टोकरी, फुलदानी, जुत्ताचप्पल रख्ना र्‍याक, हृयांगरलगायत सामग्री निर्माण कैना सीप सिखल हुइटु ।’

अटोमोबाइल विधा अन्तर्गत इलेक्ट्रिक कार, मोटरसाइकल मर्मत तालिम सञ्चालन हुइल रहे । कैलालीके भजनी–७ के २७ वर्षीय सुन्दर कठरिया इलेक्ट्रोनिक कार मर्मत तालिम लेहल बाटै । उहाँ इभि गाडी प्रयोगके जमाना रहल ओरसे उक्त तालिम रोजल बटैलै । ‘अब्बेक तालिम बेसिक रहे, एडभान्स तालिम लेहे पैलेसे मजा हुइट,’ कठरिया कहलै ‘एडभान्स तालिम लेके स्वदेशमे ग्यारेज खोल्ना विचार बा ।’

निर्माण तालिम विधा अन्तर्गत टायल मार्बल फिक्स्चर, डकर्मी, फर्निचर, विल्डिङ ओ प्लम्बिङ तालिम सञ्चालन हुइल रहे । बीबीएस अध्ययन कैटी रहल कञ्चनपुरके कृष्णपुरके २५ वर्षीय शंकर धामी प्लम्बिङ तालिम लेलै । ‘पढाईसँगे सीप फेन रलेसे भविष्यमे अपनहे करे सेकजाइ कहिके तालिम लेहल हुइटुुँ,’ उहाँ कहलै, ‘सहरबजारमे स्कोप फेन मजा बा ।’ पहुना सत्कार विधा अन्तर्गत कफी बारिस्ता, फास्टफुडरकुक, वेटर, रिसेप्सनिष्टरफ्रन्ट डेस्क तालिम सञ्चालन करल रहे । ओस्टके, इलेक्ट्रिकल ओ मेकानिकल विधा अन्तर्गत वेल्डिङ, रेफ्रिजरेशन ओ एसी, मोबाइल, सिसिटिभी, बिल्डिङ ईलेक्ट्रिकल वाइरिङ रहल रहे । प्लस टु पह्रटी करल बझाङ बुगल–८ कपल्सेरीके सुवास बोहरा बिल्डिङ वाइरिङ तालिम लेले बाटै । ‘वैदेशिक रोजगारीके लाग कोरियन भाषा सिख्टी रहल अवस्थामे यहाँ तालिम हुइना लागल पता पैनु । पहाड ओर बिल्डिङ वायरिङके मजा स्कोप बा ।

ओहेमारे आवेदन डेहल रहुँ । नाउँ निकरगैल,’ उहाँ कहलै ‘पहाडओर फेन अस्टे तालिम सञ्चालन हुइट कलेसे मजा हुइट ।’
धनगढी–१२ जुगेडाके सुरत बोगटी फेन तालिम लेहे पाइलमे खुसी बाटै । पाँच बरस भारतुमे मजदुरी कैके घर आइल रहिट । वाइरिङमे रुची रहल बोगटी तालिम खुलल् जानकारी पैलै । ‘वाइरिङके तालिमके खोजीमे रहुँ, ठ्याक्कै तालिम फेन खुलल् रहे,’ उहाँ कहलै, ‘घरमे वाइरिङ करे सेक्ना हुइल बाटु । आब भारत जैना विचार नैहो ।’ सूचना प्रविधि विधामे डिजिटल मार्केटिङ, हार्डवेयररनेटवर्किङ, ग्राफिक डिजाइनर ओ अटोक्याड तालिम सञ्चालन हुइल रहे ।

धनगढीके विपना जोशी ग्राफिक डिजाइनिङके तालिम लेहल बाटी । व्यवस्थापन संकायमे स्नातकोत्तर करटी रहल जोशी ग्राफिक डिजाइनिङके स्कोप डेखके उ विधा रोजल बटैली । ‘सैद्धान्तिक ज्ञान किलसे कुछ नैहुइना, उहे मारे सीपमूलक तालिममे सहभागी हुइल रहुँँ,’ विपना कहली ‘एक महिनाके तालिमसे आधारभूत ज्ञान किल प्राप्त करे सेकगैल । आब उपल्लो तहके तालिम लेके स्वरोजगार बन्ना आकांक्षा हो ।’

शैक्षिक विधा अन्तर्गत ईसीडी शिक्षक तालिम, पुरोहित ओ लेखा व्यवस्थापन तालिम सञ्चालन हुइल रहे । धनगढीके भगवती चापागाई शिक्षाशास्त्र संकायमे स्नात्तकोत्तर हुइटी । सीप तथा रोजगार मेलामे उहाँ ईसीडी शिक्षक तालिम लेली । ‘मोर शैक्षिक पृष्ठभूमि फेन शिक्षा शास्त्र रहल ओरसे मन्टेश्वरी शिक्षकमे रुची होके उहे तालिम रोजल हुइटुँँ,’ भगवती कहली ‘शैक्षिक योग्यताके प्रमाणपत्र रलेसे फेन उचित तालिम नैपाइल रहुँ । यी तालिमसे ढेर आत्मविश्वास हुइल बा । आघे बह्रक लाग हौसला प्राप्त हुइल बा ।’ ओस्टके, स्वास्थ्य तथा सौन्दर्य तालिम विधा अन्तर्गत एडभान्स ब्यूटिसियन, हेयर कटिङरस्टाइलिङ ओ नाई तालिम सञ्चालन करल रहे ।

आर्ट एण्ड क्राफ्ट डिजाइनिङ अन्तरगत फेसन डिजाइनिङ तालिममे सबसे ढेर आकर्षण डेखगैल आयोजक जनैले बा । उक्त तालिमके लाग ५० जाने माग करलमे सबसे ढेर ६ सय ३० जनहनके आवेदन परल रहे । ओस्टके सौन्दर्य अन्तरगत एडभान्स ब्युटिसियनके लाग फेन ५० जाने माग करलमे ५ सय ८७ के आवेदन परल रहे । शैक्षिक क्षेत्र अन्तरगत लेखा व्यवस्थापनमे ५० के कोटामे ४ सय ६३ ओ एडभान्स टेलरिङमे २५ जनहनके कोटामे ४ सय १६ जनहनके आवेदन परल रहे ।

पहुना सत्कार क्षेत्र अन्तर्गत कफी बारिस्ताके लाग २५ मे ३ सय ७५, सांस्कृतिक पोषाक निर्माणमे ७२ जाने मागलमे २ सय २०, शैक्षिक क्षेत्र अन्तरगत ५० जाने इसिडी शिक्षक तालिमके कोटा राखलमे २ सय १८, अटोमोबाइल्सतर्फ विद्युतीय कार मर्मतमे २५ जनहनके कोटा टोकलमे १ सय २४, सौन्दर्य क्षेत्र अन्तरगत हेयर कटिङ स्टाइलिङमे ५० जाने माग करलमे १ सय १७, मोटरसाइकल ओ स्कुटर मर्मत तालिमके लाग २५ जनहनके कोटा टोकलमे ८६ जाने आवेदन डेहल रहिट । ओस्टके निर्माण क्षेत्र अन्तर्गत डकर्मी तालिममे ५० जाने माग करलमे ५६ जाने आवेदक परल रहे । फर्निचर, विल्डिङ पेन्टर ओ प्लम्बिङमे समान २५/२५ जनहनके लाग आवेदन खुलाइलमे फर्निचरके लाग २६ जाने, प्लम्बिङमे ३७ जाने आवेदन डेहल रहिट ।

कुछ तालिममे भर कोटासे कम संख्यामे आवेदन परल रहे । टायल तथा मार्बल फिक्स्चरमे ५० जनहनके कोटा रहलमे ३४, विल्डिङ पेन्टरमे भर २० जाने किल आवेदन डेहल रहिट । वेटरके लाग भर ३१, विल्डिङ पेन्टरमे २० जाने सहभागी हुइल रहिट । डिजिटल मार्केटिङके प्रशिक्षक रेखा चौधरी तालिममे ८ जाने महिला ओ १७ पुरुष २५ जाने सहभागी रहल बटैली । ‘डिजिटल मार्केटिङके अब्बेक जमानामे प्रशिक्षार्थीहुक्रनके फेन ढेर आकर्षण डेखगैल,’ चौधरी कहली ‘डोटी, अछामलगायत जिल्लासे तालिममे सहभागी हुइल रहिट ।’ टायल मार्बल तालिमके प्रशिक्षक गंगादत्त भट्ट उक्त तालिममे ५ महिला, ४२ पुरुष सहित ४७ जाने सहभागी रहल बटैलै । ‘टायल मार्बलमे काम करुइया योग्य मिस्त्री महिनामे ५० हजारसम सहजे कमाइ सेक्ना अवस्था बा,’ उहाँ कहलै ।

सीप तथा रोजगार मेलामे सहभागी एक महिनाके तालिम लेहलपाछे दुई दिन रोजगार मेला फेन सञ्चालन करल उपमहानगरपालिका जनैले बा । मेलासे रोजगारदाता ओ रोजगारीके खोजीमे रहल व्यक्ति बीच समन्वय कराके रोजगारीमे जोरजैना अवसर डेना उपममहानगरके कहाइ रहल बा । ४ हजार ७२२ जाने आवेदन डेहलमे १ हजार ४० जाने छनोट होके तालिम डेहल उक्त सीप तथा रोजगार मेलामे आठ विधाके तालिमके लाग ९२ जाने प्रशिक्षक रहल रहिट । प्रशिक्षक कैलाली, काठमाडौं, बाँके, बर्दिया, कञ्चनपुर, बैतडी, डोटी, सुर्खेत, नुवाकोट, धादिङ, भक्तपुर, सिन्धुपाल्चोकलगायतके स्थानसे आइल रहिट ।

धनगढी उपमहानगरके मेयर गोपाल हमाल युवाहे सीपमूलक तालिम प्रदान कैके स्वरोजगार बनाइक लाग सीप तथा रोजगार मेला सञ्चालन करल बटैलै ।