जलवायू परिवर्तन सम्बन्धी अभिमुखीकरण कार्यक्रम

खुशीराम चौधरी,
बर्दिया, १७ चैत । राजापुर, बर्दियामे जलवायू परिवर्तन सम्बन्धी सचेतना मुलक कार्यक्रम सम्पन्न हुइल बा । कार्यक्रममे मौसम, जलवायू परिवर्तन, कारण ओ असरके बारेमे छलफल हुइल बा ।

कार्यक्रमके सहजीकरणके करटी शैलेन्द्र मजगैंयासे, “दैनिक रुपमे कौनो निश्चित भुगोलमे हुइना हावापानीके फेरवदलहे मौसम कहिजैना ओ यैसिक हुइना लम्मा समयावधि (करिब ३० वर्ष) हुइना मौसमके परिवर्तनहे जलवायु परिवर्तन कहिजैना उहाँ बटैलै । सहजीकरणके क्रममे जलवायु परिवर्तन ओ उहीसे हुइना असर तथा न्यूनीकरणके उपायबारे जानकारी कराइल रहिट ।

जलवायु न्यायके लाग नागरिकसे करे सेक्ना भूमिकाके बारेमे छलफल करल बा । हरितगृह ग्याँस उत्सर्जन प्रक्रिया ओ उहीसे मानव जनजीवनमे पर्ना प्रभावबारेफे जानकारी करैनाके साथे राजापुर नगरपालिकाके वन, वातावरण तथा विपद् व्यवस्थापन शाखा अन्र्तगत आ.व.२०८१÷०८२ मे विनियोजित करल बजेटबारे जानकारी कराइल रहे ।

प्राकृतिक कारण संगसंगे जलवायु परिवर्तनके प्रमुख कारक मानवीय व्यवहार हो । नेपालमे ०.०६ डिग्री औसतमे तापक्रम बृद्धि हुइल अध्ययनसे पुष्टि करले बा । नेपाल प्रतिवर्ष ०.०२५ प्रतिशत हरितगृह ग्याँस निष्काशन करठ । जौन और देशके तुलनामे नगन्य बा । मने जलवायु परिवर्तनके असरके जोखिमके हिसाबसे चौंथा, बाढके जोखिमके हिसाबसे ११ औं ओ भुकम्पके जोखिमके हिसाबसे २९ औं स्थानमे रहल उहाँ जनैलै ।

जलवायु परिवर्तन बिश्व औसतसे ढेर बा । नेपालमे सक्कु मेरिक जलवायु पाजाइठ । नेपालके पहाड, भिड ओ कोमल बा हमार जिबिका प्रकृतिमे भर बा । आर्थिक अवस्था कमजोर बा । हमार मानवीय श्रोतफे कमजोर बा । टबमारेफे नेपालमे जलवायु परिवर्तनके असर जोखिमके हिसाबसेफे उच्च रहल सहजकर्ता शैलेन्द्र बटैलै ।

जलवायु परिवर्तनके कारणसे पानी कम पर्ना वा एक्कासी ढेर पर्ना, छटरी नैओढेके वर्षामे धान लगाई सेक्ना, अरहरके उत्पादन नहुइना, मास तथा उरुदके उत्पादनमेफे कमी हुइल सहभागिहुक्रे बटैलै ।

मुक्त कमैया समाज सदस्य लाली थारु हमार दैनिक व्यवहारमे सुधार करेपर्ना, कृषी खेतीपाती करेबेरफे रसायनिक मल तथा विषादीके अधिक प्रयोग करटी रहल बटैली ।

रैथाने बालीके संरक्षण करके प्रागारिक मलके प्रयोग कैना ओ वातावरणमैत्री व्यवहार अवलम्बन कैना अति जरुरी रहलफे उहाँ बटैली  । कार्यक्रममे मुक्तकमैया, युवा,वडघर, श्रमिक, वडघरके सहभागिता रहे । राजापुर नगरपालिकासंग समन्वय करके एक्सन एड नेपालके आर्थिक सहयोग कमैया महिला जागरण समाज नेपाल आयोजनामे अँटवारके रोज हुइल रहे ।

प्रशिक्षार्थी पत्रकार, श्री अमर शहिद बहुमुखी क्याम्पस, राजापुर, बर्दिया, मानविकी संंकाय, टिसरा वर्षमे अध्ययनरत बटै ।