हरियाली महिला समुदायिक वनके १७औं वार्षिक साधारण सभा
जीवन चौधरी
पहलमानपुर, १७ चैत । कैलाली जिल्लाके भजनी नगरपालिका वडा नम्बर ९ खुरहुरियामे रहल हरियाली महिला सामुदायिक वन उपभोक्ता समूहके १७ औं वार्षिक साधारण सभा तथा सार्वजनिक सुनुवाई कार्यक्रम सम्पन्न हुइल बा ।
समुहके अध्यक्ष श्रीपाल चौधरीके अध्यक्षतामे हुइल कार्यक्रममे बरका पहुना सुदूरपश्चिम प्रदेश सभा सदस्य घनश्याम चौधरी रहल रहिट । कान्द्रा लडियासे कटानीसे रोकेक लाग प्रदेश सरकारसे तटबन्धके बजेट माग कैना उहाँ बटैलै ।
कार्यक्रममे विशिष्ट पहुना भजनी नगरपालिका वडा नम्बर ९ के वडाध्यक्ष सन्दीप चौधरी खुरहुरिया गाउँमे रहल सामुदायिक वन बचाइक लाग कान्द्रा लडियामे कटानी रोकेक लाग वडा कार्यालयसे बजेट विनियोजन कैना प्रतिवद्धता जनैलै ।
सव डिभिजन वन कार्यालय भजनीके वन रक्षक प्रकाश विक सोचलसेफे ढेर यहाँके उपभोक्ता बनुवा बचाइल बटैलै ।
कार्यक्रममे शुभकामना मन्तव्य हरियाली पार्वती सामुदायिक वनके अध्यक्ष राहुल बुढा सामुदायिक वनके साधारण सभा समयमे कैना बटैलै ।
ओम शान्ति सामुदायिक वन उपभोक्ता समुह कार्यालय सचिव हेमराज चौधरी हिसाव पारदार्शि रख्ना जरुरी रहल बटैलै ।
सिएफसिसि भजनीके सचिव इन्द्र विक सामुदायिक वनके साधारणसभा कुवाँर महिनामे करेपर्ना बटैलै । संचारकर्मी जीवन चौधरी वनजंगल जोगाइलक लाग छोट बच्चा जस्टे स्याहार करे पर्ना बटैलै ।
खुरहुरियाके भल्मन्सा विरबहादुर चौधरीफे शुभकामना मन्तव्य राखल रहिट । कार्यक्रममे थारु महालोक गायक मनिराम करिया मघरिया जनचेतनामुलक गीत गाके मनोरन्जन प्रदान करल रहिट । वार्षिक साधारणसभाके अवसरमे उ सामुदायिक वनसे गरिब तथा अपाङता रहल बालबालिकाहे सम्मान कैगिल रहे ।
कार्यक्रम संचालन तथा आयव्यय विवरण प्रस्तुत समुहके सचिव मनिता कुमारी चौधरी करल रहिट ।
