पाँच दिने उद्घोषण तालिम सम्पन्न

खुशीराम चौधरी
बर्दिया, १८ चैत । राजापुर न.पा. वडा नं. ६, टपरामे पाँच दिने उद्घोषण तालिम सम्पन्न हुइल बा ।
राजापुर नगरपालिका ६ नं. वडा कार्यलयके आर्थिक सहयोग, प्रेस सेन्टर नेपाल बर्दियासंगके समन्वयमे सञ्चारिका समुह बर्दियाके आयोजनामे उ तालिम हुइल हो ।

वडा नं. ६ के सक्कु गाउँ टोलके प्रतिनिधित्व हुइना करके नेतृत्वकर्ताहुकनहे छनौट कैगिल रहे । २०८१ चैत १३ से १७ गते सम सञ्चालन हुइल उ तालिममे युवा, महिला, विद्यार्थी लगायत वुद्धिजिवी प्रशिक्षार्थीहुकनके सक्रिय सहभागिता रहे । नेतृत्व विकास ओ क्षमता अभिवृद्धि कैना उद्देश्यसे सञ्चालन करल उद्घोषण तालिममे २५ जाने प्रशिक्षार्थी रहल रहिट ।

पत्रकारद्धय मेनका चौधरी ओ साहित्यकार एवम् उद्घोषक महेशराम थारु प्रशिक्षण डेहल रहिट । सैद्धान्तिक ओ प्रयोगात्मक विधि मार्फत तालिममे प्रशिक्षण करल रहे । जिहीसे प्रशिक्षार्थीहुक्रे उद्घोषण कलासंग आत्मबल बह्रल ओ अपन गाउँ ठाउँमे छोट छोट कार्यक्रम अपनही सञ्चालन करे सेक्ना हिम्मत बह्रल बटैलै । उद्घोषण तालिम समापन कार्यक्रममे प्रशिक्षार्थी मध्ये एक जाने कार्यक्रम समापन सत्र औपचारिक रुपमे सञ्चालन करल रहिट । तालिम पश्चात प्रशिक्षार्थीहुकनहे प्रमाण पत्रकेफे व्यवस्था करल रहे ।

तालिम समापन कार्यक्रमके प्रमुख अतिथि तथा राजापुर नगरपालिका वडा नं. ६ के वडा अध्यक्ष असराज न्यौपाने प्रशिक्षार्थीहुकनहे प्रमाणपत्र हस्तान्तरण करटी उद्घोषण कला जिवन उपयोगी कला रहल बटैलै । यी कलामार्फत आर्थिक स्रोत आर्जन करेक लाग ढेर सहयोग हुना बटैलै । उहाँ प्रशिक्षार्थीहुकनके उज्जवल भविष्यके कामना सहित बधाई फे डेहल रहिट ।

राजापुर नगरपालिका वडा नंंं. ६ वडा कार्यालयसे आ.व. २०८१÷०८२ के लाग दलित तथा अतिविपन्न परिवारके छावाछाईनहे बेसिक ड्राईभिङ, कम्प्युटर, पत्रकारिता तथा उद्घोषण कार्यक्रम सञ्चालन शिर्षकमे रु २ लाख बजेट विनियोजन करले बा ।
प्रशिक्षार्थी पत्रकार (खुशीराम चौधरी) श्री अमर शहिद बहुमुखी क्याम्पस, राजापुर, बर्दिया, मानविकी संकाय, टिसरा वर्षमे अध्ययनरत बटै ।