मन्त्रीके ‘विवादित अडियो’ बारे कारबाहीके चेतावनी
पहुरा समाचारदाता
धनगढी, १८ चैत । नागरिक उन्मुक्ति पार्टीके ओरसे मन्त्री हुइल लक्ष्मण किशोर चौधरीलेके ‘विवादित अडियो’बारे अब्बे पार्टी फेन चासो डेखैले बा ।
सुदूरपश्चिम प्रदेशके उद्योग पर्यटन वन तथा वातावरण मन्त्री रहल चौधरी कुछ दिन पहिले आर्थिक चलखेल करे खोजल सङ्केत डेखजैना मेरके अडियो सार्वजनिक हुइल रहे । दिगो वन व्यवस्थापनसम्बन्धी कार्यविधि आपन अनुकूल बनाके ढेर आर्थिक लाभ लेहे सेकजैना विषयमे काठ व्यवसायी ओ सचिवालयके कर्मचारीसँग गोप्य छलफल करल अडियो सार्वजनिक हुइलपाछे मन्त्री चौधरीहे मुख्यमन्त्री कमल बहादुर शाह शनिच्चरके राजीनामा डेहक लाग निर्देशन डेहल रहिट । उ लगत्ते मन्त्री राजीनामा डेहल रहिट ।
चौधरी राजीनामा डेहल दोसर सकारे नाउपाके अध्यक्ष रन्जिता श्रेष्ठ, संरक्षक रेशम चौधरी, संसदीय दलके नेता गङ्गा चौधरी, प्रमुख सचेतक लालवीर चौधरी ओ नागरिक उड्डयन तथा पर्यटन राज्यमन्त्री अरुण चौधरी धनगढी पुगल रहिट । अध्यक्ष संरक्षकसहित केन्द्रसे आइल पुरे सांसदके टोली सुदूरपश्चिम प्रदेश सभामे आपन सांसदहे विवादित अडियो ओ मन्त्रीके अवस्थाबारे जानकारी लेहल रहिट । मन्त्रीके प्रसङ्गमे छलफल हुइटी रहल बेला राजीनामा डेहल मन्त्री भर बैठकमे उपस्थित नैरहिट ।
‘मै उहाँहे खबर करल रहुँ स्वास्थ्य अवस्थाके कारण उहाँ आइ नैसेक्ना बटाइल रहिट’ नागरिक उन्मुक्ति पार्टी संसदीय दलके नेता घनश्याम चौधरी बैठकमे सुनैलै । दिनके तीन बजेसे करिब तीन घण्टासम चलल् बैठकमे नागरिक उन्मुक्ति पार्टीके करिब सक्कु सांसद आपन धारणा राखल रहिट । उहाँहुक्रे मन्त्री रहलेसे आउर सार्वजनिक हुइल अडिओबारे प्रस्ट हुइना जोड डेहल रहिट । ‘अडियो रेकर्डबारे सबसे ढेर छलफल हुइल रहे । ढेर जाने उ विषयमे चासो राखल रहिट सम्बन्धित सांसद उपस्थित नैहोके उ विषयमे कौनो निष्कर्ष नैआइल’, छलफलमे सहभागी एक सांसद कहलै, ‘अडियो रेकर्डके विषयमे पार्टी छानबिन कैना कहल बा ।’
अडियो रेकर्ड सार्वजनिक हुइलेसे फेन नैतिकताके आधारमे राजीनामा डेहल कहटी कुछ मन्त्रीके प्रशंसा करल रहिट । मने, उक्त रेकर्डबारे सत्य तथ्य सार्वजनिक हुइपर्ना उहाँहुक्रे फेन माग राखल रहिट । बैठकसे संसदीय दलहे उ विषयमे छानबिन कैना जिम्मा डेहल बा ।
‘उहाँहे स्पष्टीकरण पुँछब स्पष्टीकरण चित्तबुझ्ना मेरके आइ कलेसे उहे अनुसार हुइ चित्तबुझ्दना मेरके नैआइ करलेसे कारबाही प्रक्रिया आघे बह्री’ छानबिनके जिम्मा पाइल एक सांसद कहलै ।
बैठकसे संस्थापक सदस्य रामलाल डगौराहे अनुशासन समितिके संयोजकके जिम्मेवारी डेहल रहे । अनुशासन समिति संयोजक डगौरा फेन अडियो रेकर्डबारे छानबिन हुइना ओ दोषि डेखगैलेसे कारबाही कैना बटैलै ।
‘छानबिन कैके सत्य तथ्य सार्वजनिक करे परठ् कना विषयमे छलफल हुइल रहे । संसदीय दलके नेताहे ओकर जिम्मा डेले बाटी । मन्त्री नियत नै गलत राखके बार्गेनिङ करल पुष्टि हुइलेसे कारबाही हुइ’, उहाँ कहलै ।
कुछ महिना पहिले अनौपचारिक रुपमे करल संवादहे लेके आपनहे विवादमे टानल बैठकमे चौधरी खबर पठाइल रहिट ।
लक्ष्मण किशोर चौधरी राजीनामे डेहलपाछे आब नाउपासे के मन्त्री बन्ना कना विषय फेन सामान्य रुपमे चर्चा पाइल रहे । मने, ओकर निर्णय केन्द्रीय समितिसे कैना हुइल बा ।
बैठकमे केन्द्रीय अध्यक्ष ओ संरक्षकके अक्के स्वर सुनल रहे । उहाँहुक्रे पार्टीमे अराजकता मौलाइल कहटी सक्कु जनहनहे अनुशासनमे बैठ्ना निर्देशन डेहल रहिट ।
‘पार्टी विधिमे चले परठ् । सक्कु चीज सामाजिक सञ्जालमे छरपस्ट पारके नैहुइठ् । विमति रलेसे पार्टी भित्रे राखे परठ्’, सांसदहुक्रनहे सम्झैटी डुनु जाने कहले रहिट, ‘हम्रहीनसे जनता ढेर अपेक्षा करले बाटै । काल्हसम ज्या ज्या हुइल आब फेनसे सक्कु जाने मिलके आघे बह्रे परल ।’
बैठकमे जनमत पार्टीसँग हुइना एकताबारे फेन छलफल हुइल रहे । टीकापुरमे वार्ता बैठके एकताके विषयहे आघे बह्रैना सांसदहे नेताहुक्रे जानकारी कराइल रहिट ।
