पत्रकार हत्याके विरोधमे ज्ञापनपत्र बुझागिल

पहुरा समाचारदाता
धनगढी, १८ चैत । गैल चैत १५ गते पत्रकार हत्या तथा संचारगृहमे हुइल आक्रमणके विरोधमे प्रमुख जिल्ला अधिकारीमार्फत प्रधानमन्त्रीहे ज्ञापनपत्र बुझागिल बा ।

नेपाल पत्रकार महासंघ कैलाली सोम्मारके रोज कैलालीके प्रमुख जिल्ला अधिकारी गोगनबहादुर हमालमार्फत प्रधानमन्त्रीहे ज्ञापनपत्र बुझागिल हो ।

प्रमुख जिल्ला अधिकारी हमालहे पत्रकार महासंघ कैलालीके अध्यक्ष श्रवण देउवा ओ प्रदेश अध्यक्ष भरत शाह ज्ञापनपत्र हस्तान्तरण करल रहिट । ज्ञापनपत्रमे भिडिओ खिच्न क्रममे पत्रकार सुरेश रजकके आगीमे जरके ज्यान गैल, अन्नपूर्ण पोष्ट दैनिकके कार्यालय भवनके भुईतल्लमे आगी लगैना लगैनाके साथे ढुङगामुढा करके क्षति पुगाइल, कान्तिपुर टेलिभिजनके भवनमे ढुङगामुढा करके क्षति पुगाइल, हिमालयन टेलिभिजनके सवारी साधानमे तोडफोड करके क्षति पुगाइल, पत्रकार दिनेश गौतमउप्पर आक्रमण करके गोर टुरल, फोटो पत्रकार निरज तामाङके क्यामरा हेराइल बा । उल्लेखित घटनाप्रति नेपाल पत्रकार महासंघ गम्भीर हुइल बा ।

यिहे १५ गते काठमाडौमे राजाबादी आन्दोलनके हिंसात्मक आन्दोलनमे आराजक मनैनके भिडसे संचारगृह तोडफोड, पत्रकार सुरेश रजकके आगीमे जरके मृत्यु हुइल ओ पत्रकार उप्पर हातपात ओ कुटपिट करलमे सरकारके ध्यानार्कषण करैना ज्ञापनपत्र बुझाइल नेपाल पत्रकार महासंघ कैलाली शाखाके अध्यक्ष श्रवण देउबा जानकारी डेलै ।

प्रमुख जिल्ला अधिकारी हमाल ज्ञापनपत्र बुझ्टी अपने आजु उ ज्ञापनपत्र सरकारहे पठैना जनैलै । कैलाली जिल्लामे शान्ती सुरक्षा अमन चयनके साथे पत्रकारके सुरक्षाके लाग अपने कटिबद्ध रना उहाँ बटैलै ।