चैतन्यसे ब्रिज कोर्ष संचालन कैना

पहुरा समाचारदाता
धनगढी, १९ चैत । धनगढीमे रहल चैतन्य पाठशाला बुधके रोजसे चैतन्य ब्रिज कोर्ष संचालन कैना जनैले बा ।

मंगरके रोज चैतन्य पाठशालासे पत्रकार सम्मेलनके आयोजना करके एसईइ डेके बैठल ओ कक्षा ११ मे भर्ना हुइना तयार रहल विद्यार्थीहुकनके लाग चैतन्य व्रिज कोर्स संचालन करेजैटी रहल चैतन्य एकेडेमी तथा पाठशालाके अध्यक्ष गणेश प्रसाद जोशी जनैलै ।

विद्यार्थी समुदाय तथा राष्ट्रके लाग भविष्य हुइट, उहाँ कहलै, ‘ ब्रिज कोर्षसे कक्षा १० ओ ११ बिचके अन्तरहे पूरा करेक लागे पाठ्यक्रम तयार करल बा । यिहीसे विद्यार्थीहुकनके प्रतिस्पर्धात्मक क्षमता वृद्धि करटी प्रतिष्ठित कलेज तथा प्लस् टु मे छात्रवृत्ति सुविधा भर्नाके लाग बल्गर आधार निर्माण करी ।’

एसईई. डेके बैठल विद्यार्थी भैया बहिनीयाके लाग उच्च शिक्षामे टेवा पुगैना उद्देश्यके साथ चैतन्य एकेडेमी यिहे चैत २० गते बिहान ७ः बजे ओ साँझ ४ः३० बजेसे कक्षा सञ्चालन हुइना अध्यक्ष जोशी बटैलै ।

काठमाडौंमे व्रिज कोर्ष पह्रलेसे ३० हजारमे पह्रे पैना मने चैतन्य व्रिज कोर्षमे उहे सुविधा जम्मा ३ हजारमे डेना उहाँ बटैलै । चैतन्य ब्रिजकोर्षके अलावा थप विशेषता चैत महिना भर भर्ना हुइना विद्यार्थीनहे ५० प्रतिशत छात्रवृत्तिके सहुलियत हुइना जनागिल बा ।

प्रत्येक हप्ता नमूना परिक्षा लेना, दक्ष शिक्षकके समूहसे शिक्षण तथा सुविधा सम्पन्न कक्षामे शिक्षण करैना, ब्रिज कोर्षमे सामेल हुइना विद्यार्थीनहे अभ्यास पुस्तक एवम् टि सर्ट प्रदान कैना जनागिल बा ।

आयरल्यान्डके चैतन्य स्वयम् सेवी शिक्षकसे अग्रेजी बोलीचाली तथा व्याकरणके कक्षा सञ्चालन हुइना, यकर साथसाथे एसइईके प्रवेश पत्रके साथमे अइना विद्यार्थी एक हप्तासम निः शुल्क पह्रे पैना एकेडेमीसे पत्रकार सम्मेलनमे जानकारी डेले बा ।

पाठशालाके प्रधानाध्यापक प्रेमनिधी ओझा एसइइ डेसेकल विद्यार्थीनके लाग परिक्षाफल प्रकाशित नैहुइटसमके लाग अब्बेक समय महत्व रहल बटैलै । अब्बेक समय बालबालिका सदुपयोग करे नैसेक्लेसे आपन आनीबानी, शैक्षिकस्तरमे बाधा पुगे सेकठ, उहाँ कहलै, ‘ व्रिज कोर्ष उच्च शिक्षासम जोरना काम करी । चैतन्य पाठशालासे पहिल चो व्रिज कोर्ष संचालनमे ल्याने बा । साथ साथे शैक्षिक शत्र २०८२ के लाग कक्षा ११ के विज्ञान, होटल म्यानेजमेन्ट, व्यवस्थापन संकाय संचालनके लाग तयारी हुइटी बा । व्रिज कोर्षमे अँग्रेजी कमुनिकेशन कक्षा, गणित, बायोलोजी, फिजिक्स, क्यामिष्ट्री, म्याठमेटिक्स रहल उहाँ जनैलै ।

पत्रकार सम्मेलनमे पाठशालाके पिटिए अध्यक्ष ईश्वर गिरी, पाठशालाके डाईरेक्टर कटक बहादुर सिह, पत्रकार लगायतके उपस्थिति रहल रहे ।