ओरेकके ३४औं स्थापना दिवस
जिल्लास्तरके महिला सेभ हाउस बनैना जरुरी बाः जिसस प्रमख
पहुरा समाचारदाता
धनगढी, १९ चैत । ओरेक नेपालके ३४औं स्थापना दिवस मंगरके रोज धनगढीमे एक कार्यक्रमके विच मनागिल बा ।
जिल्ला समन्वय समिति कैलालीके प्रमुख टिकाकुमारी चौधरी भुलके वरका पहुनामे हुइल कार्यक्रममे उहाँ ओरेक नेपाल लैङिक हिंसासंग जोरके अभियान संचालन करल बटैली ।
अब्बे परिस्थितिमे ग्रामीण क्षेत्रसेफे शहर क्षेत्रमे लैङिक हिंसा हुइल बा । विपदके बेला लैङिक ंिहंसा ढेर हुइना ओरसे महिला, जेष्ठ नागरिक, अपाङता रहल व्यक्ति, बालबालिकाहुकनहे बह्रवा डेना आवश्यक रहल बटैली ।
संस्कार विस्रैटी गैल ओरसे नैतिक शिक्षा, भौतिक विकाससंगे मानविय, सामाजिक विकास जरुरी रहल जिसस प्रमुख बटैली । महिला हिंसाके घटना बह्रटी ओरसे प्रत्येक पालिकामे महिला सेभ हाउसके आवश्यकता बा । उ सम्भव नैहुइल ओरसे जिल्लास्तरके मापदण्ड अनुसार महिला सेभ हाउस जरुरी रहल उहाँ बटैली ।
सेभ हाउस बनाइक लाग छोट–छोट बजेटसे नैहुई, उहाँ कहली, ‘मै आपन अध्यक्षतामे बैठक बैठाके स्थानीय तहसे समन्वय करके आघे बह्रना छलफल करले बटु ।’
कार्यक्रमके विशिष्ट पहुना धनगढी उपमहानगरपालिकाके नगर उप प्रमुख कन्दकला राना सरकारी तथा गैरसरकारी संस्था आपन उद्देश्य अनुसार काम करडेलेसे विकास ओस्टही हुजैना बटैली ।
छोट प्रयाससे भारी उपलब्धी हुुईसेकठ, उहाँ कहली, ‘सक्कु ठाउँमे पैसा चाहठ कना नैहो । पैसासे केल विकास करे सेक्जाइठ कनाफे नैहो । धनगढी उपमहानगरपालिकासे कम पैसामे पैसामे प्रत्येक शनिच्चर महिला उद्यमी मेला लगैटी आइल बा कलेसे भर्खर सीप तथा रोजगार मेला सम्पन्न करले बा । समन्वय सहकार्य ओ मितव्यायी तरिकासे करलेसे ढेर पैसा नैचाहठ ।’
कार्यक्रममे राष्ट्रिय मानव अधिकार आयोगके अधिकृत दैवज्ञराज न्यौपाने, इन्सेक प्रदेश संयोजक खडकराज जोशी, थारु कल्याणकारिण्ी सभाके निबर्तमान कार्यबाहक सभापति माधव चौधरी, महिला मानव अधिकार रक्षक संजालके जिल्ला अध्यक्ष अम्बिका भण्डारीलगायत मन्तव्य राखल रहिट ।
कार्यक्रममे ओरेक नेपाल कैलालीके जिल्ला संयोजक गीता चौधरी वार्षिक प्रगती विवरण प्रस्तुत करल रहिट । उहाँ ओरेक नेपालसे लैंगिक हिंसा निवारण कोषसे सहयोगके सिफारिस ५ जहनहन करल जनैली । जेम्ने १ जाने रु.१५ हजार ओ २ जाने रु. १० हजार, १ जाने ३० हजार, ओ १ जनहनहे २० हजारके दरसे सहयोग प्राप्त करल जिल्ला संयोजक जनैली ।
दलित महिला अधिकार मञ्चमे २ जनहनहे आर्थिक सहयोगके लाग सिफारिस करलमे ४ जाने हिंसा प्रभावित रु. १० हजार मानब अधिकार सहायता कक्षसे आर्थिक सहयोग प्राप्त हुइल बा । ८ ठो केशमे छलफल करैना सहयोग हुइल बा । ७ जनहनहे सुरक्षा आवासमे धारेक लाग सिफारिस हुइल बा ।
३ ठो केशके फैसला प्रभावितके पक्षमे हुइल, २ ठो मिलापत्र हुके गैल, ओसिएमसि २१, जिल्ला प्रहरी १५ जाने, मनोपरामर्श सेवा ३५ जाने रहल उहाँ जनैलै ।
लैङिक हिंसाके घटना दिनदिने बह्रटी उहाँ जनैली । धनगढी उपमहाननगरपालिकासे २० ठो घटना दर्ता हुइल संयोजक जनैली । ओस्टेक करके टीकापुरसे २, भजनीसे ११, कैलारीसे ९, जोशीपुरसे १, गोदावरीसे १, वर्दगोरियासे १, गौरीगंगासे ७, विरातनगरसे १, बाजुरासे १ खप्तडछान्नासे १ करके जम्मा ५५ ठो केस दर्ता हुइल संयोजक जनैली ।
महिला स्वास्थ्य शिविर संचालन ६ ह्ुइलमे १२१२ जाने महिला किशोरीहे प्रजनन् स्वास्थ्य सेवा प्रदान हुइल रहे । ओस्टेक करके ६७९ जानेक पाठेघरके मुखके क्यान्सर परिक्षण करेबेर १६ जानेक रिङ्ग पेसरी, २० जानेकमे धारल रह । १० जनहनहे अप्रेशनके लाग सेती प्रादेशिक अस्पतालमे सिफारिस कैनाके साथे समस्या डेखलहे निशुल्क औषधी डेना कार्य हुइल उहाँ जनैली ।
ओरेक नेपालके सचिव संगीता अधिकारीके अध्यक्षतामे कार्यक्रममे ओरेक नेपाल एक ठो अभियान रहल बटैली । जौन लैंिगक हिंसाके क्षेत्रमे कार्यरत उहाँ जनैली । कार्यक्रममे संचालन ओेरेक नेपालके प्रदेश संयोजक सपना थापा करल रहिट ।
