कैलारीमे प्रारम्भिक बालविकास योजनाके लाग बजेट विनियोजना कैना प्रतिवद्धता
पहुरा समाचारदाता
हसुलिया, २१ चैत । कैलाली जिल्लाके कैलारी गाउँपालिकामे अइना आर्थिक बर्षके लाग प्रारम्भिक बालविकास योजनाके लाग बजेट विनियोजना कैना प्रतिवद्धता जनागिल बा ।
‘गदै गरौ लगानी बाटो, कुलो, पुल, भवन र मन्दिरमा, थप गरौ लगानी प्रारम्भिक बालविकासमा’ कना मुल नाराके साथ कैलारी गाउँपालिकाके आयोजनामे सेतो गुराँस राष्ट्रिय वालविकास सेवाके समन्वय तथा यूनिसेफ नेपालके आर्थिक सहयोगमे सञ्चालित इएलडीएस परियोजना अन्तरगत स्थानीय तहमे एकिकृत प्रारम्भिक बालविकास योजनाके समिक्षा तथा अइना आर्थिक वर्ष के योजना तर्जुमा कार्यशाला गोष्ठीमे प्रारम्भिक बालविकास योजनाके लाग बजेट विनियोजना कैना प्रतिवद्धता जनागिल हो ।
प्रारम्भिक बालविकास उमेर समुह(गर्भावस्थासे आठ बर्षसम) के बालबालिकाके सर्वोत्तम हित तथा सर्वाङगिण विकासके लाग अन्र्तर्राष्ट्रिय अभ्यास नेपालके संविधान (२०७२) स्थानीय सरकार सञ्चालन ऐन २०७४,बालबालिका सम्बन्धी ऐन २०७५ तथा प्रचलित कानूनके अधिनमे रहिके प्रारम्भिक बालविकासके लाग प्रतिवद्धता जनागिल हो ।
प्रारम्भिक वालविकास राष्ट्रिय रणनीति २०७२–२०८८ पूर्णरुपमे कार्यान्वयन कैना, यी गाउँपालिकामे एकिकृत प्रारम्भिक बालविकास कार्यक्रम संचालन कार्यविधि २०८० पूर्णरुपमे कार्यान्वयन कैना, प्रारम्भिक बालविकास सम्बन्धी आवश्यकतामे आधारित बस्तीस्तरसे योजना छनौट, प्राथमिकीकरणके आधारमे वडासे पालिकास्तरमे एकिकृत प्र्रारम्भिक वालविकास योजना निर्माण तथा कार्यान्वयन कैना प्रतिवद्धता जनागिल बा ।
ओस्टेक करके पालिका तथा वडास्तरीय प्रारम्भिक वालविकास समिति सक्रिय करके प्रारम्भिक वालविकासके योजना कार्यान्वयनके लाग एकिकृत प्रारम्भिक वालविकास कार्यक्रम सञ्चालन कार्यविधि २०८० के हाल कार्यान्वयनमे रहल परिच्छेद ३ अन्तरगत दफा १० (क) अनुसार वालविकास संयोजकहे निरन्तता डेनाफे प्रतिवद्धता जनागिल हो ।
प्रारम्भिक वाल्यावस्थाके वालबालिका लक्षित आवश्यक न्यूनतम सेवाके अवस्था ओ चुनौती पहिचान करेक यिहे चैत १९ ओ २० गते हुइल कार्यशालामे एकिकृत प्रारम्भिक वालविकासके लाग अइना आर्थिक बर्षमे स्वास्थ्य, शिक्षा, महिला तथा वालवालिका, खानेपानी, सरसफाई, अपाङता सम्बन्धी प्रस्तावित कार्यक्रम लक्षित जनसंख्या, अनुमानित बजेट, बजेटके स्रोत, जिम्मेवारी ओ सूचक तयार करके वडागत रुपमे प्रस्तुत कैगिल बा ।
कैलारी गाउँपालिकाके अध्यक्ष राजसमझ चौधरीके अध्यक्षतामे सुरु हुइल समिक्षा तथा अइना बर्ष आर्थिक बर्षके योजना तर्जूमा समापन कार्यक्रम गाउँपालिका उपाध्यक्ष भगवतीकुमारी चौधरीके अध्यक्षतामे समापन हुइल रहे ।
समापन कार्यक्रममे सम्बोधन करटी उहाँ मानविय तथा सामाजिक विकास विना दिगो विकासके लक्ष्य पुरा हुई नैसेक्ना बटैली ।
उहाँ कहली ‘हम्रे शैक्षिक सुधारके बाट करेबेर आपन लर्कनहे संस्कार, सभ्यताके बाट सिखैना जरुरी रहल बा । विहान उठके घरपरिवारमे सघैना, बालबच्चाके गृहकार्य चेकजाँच, हेरचाह, कैनाफे जरुरी हो ।’
बजेट विनियोजन करबेर बाटो, कुलो, पुल, भवनसंगे अनिवार्य रुपमे मानविय विकास, बाल संरक्षण, बाल सहभागिता, बालअधिकार, बालबालिकामे लगानीमे ध्यान जाईपर्ना गाउँपालिका उपाध्यक्ष बटैली ।
दुई दिन संचालन हुइल कार्यक्रममे सेतो गुराँस राष्ट्रिय वालविकास सेवाके सहजकर्ता जानकी सिंह सहजीकरण करल रहिट । कार्यक्रममे प्रमुख प्रसाशकीय अधिकृत खगेन्द्रराज जोशी, वडा नम्बर १ से ९ समके सक्कु वडा अध्यक्षहुक्रे, गाउँपालिकाके सक्कु शाखाके प्रमुखहुक्रे, सेतो गुराँस राष्ट्रिय वालविकास सेवाके कैलारी गाउँपालिका संयोजक सुरज परियार, कार्यपालिका सदस्यहुकनके सहभागिता रहल रहे । कार्यक्रमके संचालन कैलारी गाउँपालिका सामाजिक विकास शाखा प्रमुख यगम कलेल करल रहिट ।
