विपद व्यवस्थापन समितिके क्षमता विकास तालिम सुरु

पहुरा समाचारदाता
हसुलिया, २१ चैत । कैलाली जिल्लाके कैलारी गाउँपालिकास्थित हसुलियामे तीन दिने विपद व्यवस्थापन समितिके क्षमता विकास तालिम सुरु हुइल बा ।

कैलारी गाउँपालिकाके आर्थिक सहयोगमे ओरेक नेपालके सहकार्यमे शसक्त आवाज महिला संस्था कैलारी–१ हसुलियाके आयोजनामे सुरु हुइल उदघाटन कार्यक्रमके वरका पहुना कैलारी गाउँपालिका अध्यक्ष राजसमझ चौधरी रहल रहिट । कार्यक्रममे सम्बोधन करटी उहाँ यी पालिका विपदके अति जोखिममे रहल ओरसे पूर्व तयारीके लाग पहिले सचेत हुई पर्ना बटैलै । उहाँ कहलै, ‘यी पालिका बर्षाके बेला डुबान, पटान ओ कटानके जोखिममे रहल बा । कलेसे गर्मी महिनामे आगलागीके जोखिममे रहल बा ।’

तालिम उदघाटन कार्यक्रम विशिष्ट पहुना विपद व्यवस्थापन समितिके संयोजक तथा वडा नम्बर ४ वडा अध्यक्ष ठागुराम चौधरी, नेपाली काँग्रेस कैलारीके सभापति कृष्ण प्रसाद चौधरी, ओरेक नेपालके जिल्ला संयोजक गीता चौधरीलगायतके सहभागिता रहे ।

तालिम उदघाटन कार्यक्रम सक्त आवाज महिला संस्था कैलारी–१ हसुलियाके अध्यक्ष गीता चौधरीके अध्यक्षतामे हुइल रहे । कार्यक्रममे स्वागत मन्तव्य सदस्य आरती चौधरी ओ संचालन अनिता चौधरी करल रहिट । तीन दिने तालिममे सहजीकरण कैलारी गाउँपालिकाके सामाजिक विकास शाखा प्रमुख यगम कलेल ओ विपद व्यवस्थापन शाखा प्रमुख भुवन बखरिया करटी बटै । तालिममे महिला तथा भल्मन्साहुकनके सहभागिता रहल बा ।