धनगढी उपमहानगरपालिकासे २८६ सामुदायिक कुकरिनके बन्ध्याकरण

पहुरा समाचारदाता
धनगढी, २१ चैत । कैलालीके धनगढी उपमहानगरपालिकासे दुई सय ८६ सामुदायिक (छाडा छोरल) कुकरिनके बन्ध्याकरण करले बा ।

उपमहानगरपालिकासे दुर्घटनाहे न्यूनीकरण करेक लाग सामुदायिक कुकरिनके बन्ध्याकरण करल हो । सामुदायिक कुकरिन कारण समस्या सिर्जना हुइलपाछे उपमहानगरपालिकासे नियन्त्रणके लाग बन्ध्याकरण करल बटाइल बा । उपमहानगरपालिकासे कुछ वर्षसे सामुदायिक कुकरिन नियन्त्रण अभियान सञ्चालन करटी आइल बा ।

सामुदायिक कुकरिनसे दुर्घटना ओ रेविज रोग लग्ना हुइल ओरसे बन्ध्याकरणके साथे रेविजविरुद्धके खोप पनि लगाइल बा । सामुदायिक कुकरिन नियन्त्रणके लाग बन्ध्याकरण सबसे प्रभावकारी उपाय रहल बटाइल बा ।
उपमहानगरपालिकासे यिहे चैत्र १७ गते अँटवारसे बुधसम सामुदायिक कुकरिनके बन्ध्याकरण शिविर सञ्चालन करल रहे । चार दिनसम सञ्चालन हुइल शिविरमे १५८ पोथी ओ १२८ भाले करके दुई सय ८६ ठो सामुदायिक कुकरिनके बन्ध्याकरण करल जनाइल बा । धनगढीमे कुकरिनके संख्या ढेर हुइल ओरसे बन्ध्याकरण करल हो ।

उपमहानगरपालिका पशुसेवा शाखा प्रमुख डाक्टर समीरकुमार ठाकुरसे चार दिनसम चलल शिविरमे छाडा छोरल कुकुरिनके केल बन्ध्याकरण करल जानकारी डेलै । छाडा छोरल कुकुरिनके संख्या नियन्त्रण कैना उपमहानगरपालिकासे हरेक वर्ष बध्याकरण शिविर आयोजना करटी आइल पशुसेवा शाखा प्रमुख ठाकुर बटैलै ।
सामुदायिक कुकुरिनके बिगबिगीके कारण मनैनमे रेविजके संक्रमण हुइना, सडक दुर्घटनामे बृद्धि हुइना तथा फोहर दुर्गन्ध बह्रनालगायतके समस्या कम कैना नियन्त्रणके प्रयास हुइटी आइल बा । पशुसेवा शाखा प्रमुख डाक्टर ठाकुरसे काठमाण्डौंके मण्डला भेटेनरी अस्पतालके प्राविधिक सहयोग ओ धनगढी उपमहानगरपालिकाके आर्थिक सहयोगमे बन्ध्याकरण शिविर सञ्चालन करल बटैलै ।

धनगढीमे बिहानके समयमे सामुदायिक कुकुर कटना ओ रखेदना जोखिम रहल उपमहानगरपालिका जनैले बा । बन्ध्याकरणसे सामुदायिक कुकुरिनके संख्या घटैना बताइल बा ।
शिविरमे खटल विज्ञसहितके टोली नगरके टोल–टोलमे पुगके कुकरिनहे नियन्त्रणमे लेके शिविर स्थलमे ल्यानके बन्ध्याकरण लगायत उपचार करलपश्चात नियन्त्रण लेहल स्थानमे छोरल डाक्टर ठाकुर बटैलै ।