नेपाल थारु संघ कैलारीके पहिल अधिवेशन

अनिता चौधरीके सभापतित्वमे नयाँ कार्यसमिति चयन

पहुरा समाचारदाता
हसुलिया, २२ चैत । नेपाली काँग्रेसके भातृ संगठन नेपाल थारु संघ कैलारी गाउँपालिकास्तरीय पहिल अधिवेशन विफेक रोज हसुलियामे सम्पन्न हुइल बा ।

तर्दथ समितिके सभापति अनिता चौधरीके अध्यक्षतामे हुइल कार्यक्रममे नेपाली काँग्रेस सुदूरपश्चिम प्रदेश सदस्य तथा कैलारी गाउँपालिका अध्यक्ष राजसमझ चौधरीके वरका पहुनामे संघके पहिल अधिवेशन हुइल हो । कार्यक्रममे सम्बोधन करटी उहाँ पार्टीभिटर थारु समुदायके हक अधिकार स्थापित करेक लाग नेपाल थारु संघके स्थापना करल बटैलै । पार्टीमे थारु समुदायसे भारी योगदान करल मुल्याङकन कम कैना ओरसे एकजुट होके आघे बह्रेपर्ना गाउँपालिका अध्यक्ष बटैलै ।

कार्यक्रममे विशिष्ट पहुना नेपाली काँग्रेस कैलालीके उपसभापति खेमराम डगौरा पार्टी विधान नैजाके सक्कु जानेक हकहितम रहिके आघे बह्रना आग्रह करलै ।

ओस्टेक करके कार्यक्रममे नेपाली काँग्रेसके महासमिति सदस्य पुरन प्रसाद चौधरी, नेपाली काँग्रेस कैलाली क्षेत्र नम्बर ३ (क) के क्षेत्रीय सचिव रमेश चौधरी, पूर्व महासमिति सदस्य तथा नेपाल थारु संघके केन्द्रीय सदस्य परसराम चौधरी, नेपाल थारु संघके केन्द्रीय सदस्य रामचरण चौधरी, नेपाली काँग्रेस कैलाली क्षेत्र नम्बर ३ (क)के क्षेत्रीय सभापति रामप्रसाद चौधरी, नेपाली काँग्रेस कैलारी सभापति कृष्ण प्रसाद चौधरी, नेपाली काँग्रेस कैलारी वडा नम्बर २ के वडा सभापति आरती चौधरीलगायत मन्तव्य राखल रहिट । कार्यक्रमके संचालन इन्द्रा चौधरी ओ स्वागत मन्तव्य हरिद्वारी चौधरी करल रहिट ।

यिहे विच नेपाल थारु संघके कैलारी गाउँपालिका स्तरीय नयाँ कार्यसमिति चयन करल हो । समितिके सभापतिमे अनिता चौधरी, उपसभापतिमे मसराम चौधरी, सुनिला चौधरी, सचिवमे तेजराम चौधरी, इन्द्रा चौधरी, कोषाध्यक्षमे हरिद्वारी चौधरी, सहसचिवमे जंजिरु चैधरी रहल बटै ।

ओस्टेक सदस्यमे द्रोपती चौधरी, सुनिता चौधरी, रामनरेश चौधरी, जगमा चौधरी, राधा चौधरी, सोना चौधरी, फिरुराम चौधरी, पवित्री चौधरी, रामपति चौधरी, घुम्नादेवी चौधरी, होरीलाल चौधरी, सञ्जु चौधरी ओ लहान्ु चौधरी रहल बटै ।