चैतन्य पाठशालासे संस्कारसहितके शिक्षा ओ प्रेरक अभिभावकत्व कार्यक्रम

पहुरा समाचारदाता
धनगढी, २२ चैत । धनगढीमे रहल चैतन्य पाठशालामे ‘चैतन्य संवाद’ संस्कारसहितके शिक्षा ओ प्रेरक अभिभावकत्व कार्यक्रम हुइल बा ।

शिक्षक अभिभावक संघके अध्यक्ष ईश्वर गिरीके अध्यक्षतामे हुइल कार्यक्रममे आध्यात्मिक गुरु एंव हिन्दु विध्यापिठ विद्यालयके संस्थापक डाक्टर चिन्तामणिनाथ योगी प्रमुख अतिथि रहल रहिट । कार्यक्रममे सम्बोधन करटी उहाँ संस्कार विनाके शिक्षाके कौनो काम नैरहल बटैलै । उहाँ कहलै, ‘हम्रे हमार लर्का ढेर नम्बर ल्यानके पास हुइलै कलेसे मार्गसिट हेरके हम्रे मख्ख परठी । मने उ लर्कनमे संस्कार कैसिन बाटिन ओहोर ओर हमार ध्यान गैल नैहो । एक ठो व्यक्ति एमए पास करल मने ओकरभिटर संस्कार नैहो कलेसे कागजके प्रमाणपत्रके कौनो काम नैहो ।’

हम्रे धनदौलतके मोहके पाछे लागके विदेशमे पह्रेजैठी, कमाई जैठी, मने आपन संस्कार, संस्कृति भुलाजैठी । हमार संस्कार संस्कृति केहोर जाइटा उ सोचे पर्ना जरुरी बा । आब सक्कु जाने आपन गाउँ, परिवार, समाज ओ प्रकृतिओर लौटना उहाँ आग्रह करलै ।

लर्कनके भविष्य मजा बनाइक लाग लर्का, परिवारसे निरन्तर संवाद आवश्यक रहलफे उहाँ बटैलै ।
महर्षि वैदिक फाउण्डेसनके निर्देशक मीनराज अधिकारी चैतन्य पाठशालामे यिहे नयाँ शैक्षिक शत्रसे चैतन्य शिक्षाके लाग सम्झौता समन्वय करे लागल बटैलै ।

पाठशालाके अध्यक्ष गणेशप्रसाद जोशी चैतन्य पाठशालासे आदर्श विद्यार्थी बनैना अभियानके साथे सामाजिक क्षेत्रमे काम करटी रहल बटैलै । उहाँ शिक्षाके माध्यमसे समाजमे पर्ना सकारात्मक प्रभावके निमित्त चैतन्यके सक्कु टिम समर्पित रहल बटैलै ।
पाठशालाके डाईरेक्टर कटकबहादुर सिंह यी कार्यक्रम अभिभावक तथा विद्यार्थीनके चौतर्फी विकासके लाग आयोजना करल बटैलै । कार्यक्रममे विद्यालयके प्रिन्सिपल प्रेमनिधि ओझा धन्यावाद ज्ञापन करटी लौवा शैक्षिक शत्र सुरु हुइलागल ओरसे अब्बे खाली समयहे सदुपयोग मजा काममे लगैना आग्रह करलै ।

कार्यक्रम संचालन विद्यालयके शिक्षिका हेमा जोशी करल रहिट । कार्यक्रममे अभिभावक, शिक्षक, पत्रकार, विद्यार्थीलगायतके उपस्थिति रहे ।