‘विशिष्ट खालके समावेशी हुइलेसे किल लोकतन्त्र सुन्दर बनी’
पहुरा समाचारदाता
लुम्बिनी, २९ चैत । सञ्चार तथा सूचना प्रविधिमन्त्री पृथ्वीसुब्बा गुरुङ राज्यके हरेक क्षेत्रमे विशिष्ट खालके समावेशी हुइलेसे किल लोकतन्त्र सुन्दर हुइना बटैले बाटै ।
शुकके रोज गौतम बुद्धके भूमि लुम्बिनीके विश्व विद्यालयमे आयोजित नेपाल आदिवासी जनजाति पत्रकार महासंघ (फोनिज) के आठौँ संघीय महाधिवेशनहे सम्बोधन कैटी उहाँ ओइसीन बटाइल हुइट ।
असमावेशीहे समावेशी बनाइक लाग सङ्घीयता आइल मन्त्री गुरुङ बटैलै । संघीयतासे किल आदिवासी जनजातिके अधिकार सुनिश्चित कैना हुइल ओरसे यकर संस्थागतके लाग आदिवासी जागरुक हुइ पर्ना बटैलै ।
‘जहाँ लोकतन्त्र वहाँ सङ्घीयता रहठ्’, उहाँ कहलै, ‘मुलकहे विखण्डनसे बचाइक लाग संघीयता लानल हुइटी ओ नेपाली नागरिकहे यी देश हमार हो कना अनुभूति डेहुवाइक लाग फेन हो ।’
नेपालके संविधानसे समावेशी ओ पूर्ण समानुपातिकके अधिकार उल्लेख करल मन्त्री गुरुङ बटैलै । संविधान अनुसार आदिवासीहुक्रनके अधिकार सुनिश्चितताके समावेशी आयोग, आदिवासी जनजाति आयोग, टमान जातिय आयोग मार्फत सरकारसे सम्बोधन कैना काम करटी रहल बा ।
ओस्टके आदिवासी जनजाति लगायतके मातृभाषाके संरक्षण ओ प्रवर्धनके लाग सरकारसे रेडियो नेपाल, नेपाल टेलिभिजन ओ गोरखापत्रमे स्थान डेहल बटैलै । मिडियामे समेत सरकारसे पूर्ण समावेशीकरण कैके काम करटी रहल बटैलै ।
ओस्टके उहाँ नेपालहे बचाइक लाग कौनो राजा अइना आवश्यक नैरहल बटैलै । उहाँ नेपालहे नेपाली नागरिक बचैटी रहल बटैलै । ‘जौन राजा आपन दरबार बचाइ नैसेक्लै, उहे राजा कैसिक देश बचाइ’, उहाँ कहलै, देश बचाइक लाग कौनो राजा नैआइ परी ।’
राजतन्त्र सदाके लाग अन्त्य होसेकल बा, आब राजतन्त्र अइना सपना नैडेखे पर्ना मन्त्री गुरुङ बटैलै ।
ओहे कार्यक्रममे लुम्बिनी प्रदेशके स्वास्थ्यमन्त्री खेमसारु मगर लुम्बिनी सरकारसे आदिवासीहे निजामतीमे १८ प्रतिशत कोटा छुट्याइल बटाइल रहिट । उहाँ लुम्बिनी प्रदेश सरकार आदिवासी जनजातिके हित हुइना मेरके काम कैटी आइल बटाइल रहिट ।
लुम्बिनी प्रदेश सरकारसे नेपालके कानुन अनुसार पूर्ण समावेशी ध्यान डेके काम करटी रहल समेत बटाइल रहिट । आदिवासी जनजातिके मातृ भाषा, साहित्यके प्रवर्धनके लाग प्रदेश सरकारसे लुम्बिनीके आदिवासी जनजाति थारू ओ मगरके भाषाहे सरकारी कामकाजी भाषा बनैना तयारीमे रहल बटैलै । ओकर लाग भाषा आयोग ओ सम्बन्धित समुदायके अगुवाहुक्रनसे छलफल हुइटी रहल समेत बटाइल रहिट ।
कार्यक्रममे फोनिजके सल्लाहकार खेम घले, पूर्व अध्यक्ष डण्ड गरुङ, प्रेस युनियनके केन्द्रीय अध्यक्ष शिव लम्साल, प्रेस चौतारीके गणेश पाण्डे, प्रेस सेन्टरके कमल गिरी लगायत शुमकामना व्यक्त करल रहिट । कार्यक्रमके उद्घाटन सत्र फोनिजके केन्द्रीय अध्यक्ष गजुरधन राईके अध्यक्षतामे हुइल रहे ।
