सडकयात्रुनके फोहोर ढरना धनगढीके सडकछेउमे ‘डस्टविन’

पहुरा समाचारदाता
धनगढी, ३ बैशाख । कैलालीके धनगढी उपमहानगरपालिकासे सडक यात्रुहुकनहे फोहोर वस्तु रख्न सडक किनारमे एंगलसहित ‘डस्टविन’ धारल बा ।

उपमहानगरपालिकासे क्याम्पसरोडसे मनेहरा कालिकाचोक सडकखण्डके दुनु साइडमे सडक यात्रुहुकनहे सरना नैसरना फोहोर वस्तु रख्न ७९ ठो जोरी ‘डस्टविन’ धारल हो ।

सडक यात्रुहुक्रे अपने उपयोग करके सेकलपाछेके वस्तुके फोहोर रख्न सहजिल होए कहिके उ सडकके दुनु छेउमे सरना नैसरना वस्तु रख्न अलग अलग ‘डस्टविन’ राखल उपमहानगरपालिका जनाइल हो । ‘हमार धनगढी सफा धनगढी’ अभियान सञ्चालन करटी आइल धनगढी उपमहानगरपालिकासे सडक यात्रुसे जहाँ पाइल उहे फोहोर नैफेक्के नगर क्षेत्रहे सफा रख्न सहयोग करिट कहिके उ सडकखण्डके दुनु किनारमे ‘डस्टविन’ धारल हो ।

‘डस्टविन’ धारलपाछे सडक यात्रुहे फोहोर रख्न सजहुल हुइल धनगढी मोतीचोकके रमिला बोहरा बटैली । उहाँ कहली– ‘पहिले सडकमे न्ैगुइया जहाँ पाइल उहे फोहोर फेक्टी नेंगिट अब उपमहानगरपालिकासे सडकके दुनु छेउमे सरना ओ नैसरना ‘डस्टविन’ धारलपाछे सडकमे नेगुइयाहे फोहोर रख्न सहजुल हुइना हुइना हुइल बा ।’

नगरहे सफा ओ स्वच्छ बनैना उद्देश्यसहित जथाभावी फोहोर फेक्ना कार्यहे न्यूनीकरण कैना सडक किनारमे ‘डस्टविन’ धारल बा । जथाभावी फोहोर नेफेक्के डस्टविनमे धारडेना उपमहानगरपालिकासे सडक यात्रुहुकनहे आग्रह करले बा ।
जथाभावी रुपमे फोहोर फेकडेहेबेर नगरक्षेत्र दुर्गन्धित हुइना ओरसे सडक किनारमे ‘डस्टविन’ धारल धनगढीके प्रमुख प्रशासकीय अधिकृत नरेन्द्रबहादुर खाती बटैलै । उहाँ नगरक्षेत्रके अधिकांस ठाउँमे सडक यात्रुहुकनहे फोहोर फेक्ना सहजुल होए कहिके सरना नैसरना वस्तु धरना अलग अलग ‘डस्टविन’ धारल ओ क्रमशः बाँकी रहल ठाउँमेफे ओस्टेहे खालके ‘डस्टविन’ रख्ना जानकारी डेलै ।

ओस्टेक धनगढी उपमहानगरपालिकाहे वातावरणमैत्री शहर बनैना नगर क्षेत्रभिटर नैग्ना सवारी साधनमे अनिवार्य ‘डस्टविन’ रख्न कहल बा । पैदल यात्रु वा सवारी यात्रुहुक्रे अटेर करके जथाभावी रुपमे फोहोर फेक्लेसे जरीवाना कैना उपमहानगरपालिका जनैले बा ।

नगरक्षेत्रमे जथाभावी रुपमे फोहोर फेक्डेना प्रवृत्ति बढटी बा, ओसिन प्रवृत्तिहे निरुत्साहित कैना ‘डस्टविन’ के व्यवस्था करल हो । यिहीसे फोहोरमैला व्यवस्थापनमे सहयोग पुग्न हुइल ओरसे तोकल स्थानमे केल फोहोर फेक्न उपमहानगरपालिकासे आग्रह करले बा ।