चिसापानी–मंगलसेन सडक खण्ड स्तरोन्नती पक्रिया आघे बह्रल
पहुरा समाचारदाता
धनगढी, ३ बैशाख । चुनावी ऐजेण्डा बन्टी आइल कैलालीके लम्कीचुहा नगरपालिका, ३ ओ मोहन्याल गाउँपालिका, ७ मे पर्ना चिसापानी–मंगलसेन सडकखण्डके १६ किमि सडक स्तरोन्नतीके लाग प्रक्रिया आघे बह्रल बावै ।
सुदुरपश्चिम प्रदेशके मुख्यमन्त्री कमल बहादुर शाहके सक्रियातामे उ सडकखण्डमे पर्ना राष्ट्रिय बन्वाके जग्गा प्रयोग ओ जग्गामे रहल रुख्वा हटाइक लाग वन तथा वातावरण मन्त्रालय, वन तथा भू–संरक्षण विभाग ओ सडक विभाग (भू–वातावरण तथा सामाजिक शाखा) बीच सम्झौता हुइलसँगे प्रक्रिया आघे बह्रल हो । राष्ट्रिय वनके ८.९२ हेक्टर जग्गा प्रयोग कैना उ जग्गामे रहल टमान जातके ४७२ ठो रुख्वा गोल हटैना वन तथा वातावरण मन्त्रालय, वन तथा भू–संरक्षण विभाग ओ सडक विभाग (भू–वातावरण तथा सामाजिक शाखा) बीच सम्झौता हुइल बावै ।
विभागके मिति २०८२ बैशाख २ गतेके निर्णयानुसार अनुसूचीमे संग्लन शर्त पालना कैना मेरके वन ऐन २०७६, वन नियमावली, २०७९ तथा अन्य प्रचलित कानूनके समेत अधिनमे रहना मेरके डुनु पक्ष बीच हुइल सम्झौतामे उल्लेख रहल बा । सम्झौता अनुसार उ बन्वा क्षेत्र प्रयोग कैना करैना तथा उ बन्वा क्षेत्रमे रहल रुख्वा/पोल हटैना डुनु पक्ष सहमति हुइल बावै ।
वन ऐन, २०७६ दफा ४२ के उपदफा (१) बमोजिम राष्ट्रिय वनके ८.९२ हेक्टर जग्गा प्रयोग कैना ओ उ जग्गामे रहल टमान जातके ४७२ ठो रुख्वा गोल हटैना स्वीकृति डेना कहिके नेपाल सरकार म.पं.वै.सं. ५०/०८०, मिति २०८०/०९/२४ मे निर्णय हुइल रहे । मंगरके वन तथा भू–संरक्षण विभाग, वन संरक्षण शाखासे डिभिजन वन कार्यालय, पहलमानपुर, कैलालीहे सम्झौता पत्र पत्राचार कैटी वन तथा वातावरण मन्त्रालय, भौतिक पूर्वाधार तथा यातायात मन्त्रालय, उद्योग, पर्यटन, वन तथा वातावरण मन्त्रालय, सिंहदरबार ओ सडक विभाग विभाग (भू–वातावरण तथा समाजिक शाखा) बबरमहलहे समेत वोधार्थ डेहल बावै ।
२०८१ चैत २९ गते सडक विभाग (भू–वातावरण तथा सामाजिक शाखा)से वन तथा भू–संरक्षण विभाग, वन संरक्षण शाखा बबरमहलहे पत्र पठैटी रुख्वा कटानीके लाग आवश्यक सम्झौता प्रक्रिया आघे बह्रैना अनुरोध करल रहे । सडक डिभिजन महेन्द्रनगर कञ्चनपुरके कार्यक्षेत्र पर्ना उक्त सडक स्तरोन्नतीके लाग वन विकास कोषमे रकम जम्मा करे पर्र्ना अवस्थामे उक्त रकम व्यवस्थापन जाहेर कैना विभागके प्रतिबद्धता रहल पत्रमे उल्लेख रहल बावै ।
उहीसे आघे संघीय सरकारसे ७.२ किलोमिटर ठेक्का सदर कैलेसे फेन रुख्वा कटानीके आदेश नैहुइल ओरसे उ कार्य आघे बह्रे नैसेकल अवस्थामे सुदुरपश्चिम प्रदेशके मुख्यमन्त्री कमल बहादुर शाह उ सडकके स्तरोन्नतीके लाग रुख्वा÷पोल हटैना सम्बन्धमे वन तथा वातावरण मन्त्री ऐनबहादुर शाही, वन तथा वातावरण मन्त्रालयके सचिव, भौतिक पुर्वाधार तथा यातायात विकास मन्त्रालयके सचिव, वन तथा भु–संरक्षण बिभागके उप–महानिर्देशक, सडक बिभागके महानिर्देशक सहित भू–वातावरण तथा सामाजिक शाखाके प्रमुख ओ सडक डिभिजन कार्यालय महेन्द्रनगरके प्रमुख भेट करल रहिट ।
विकास निर्माण कार्यहे चुनावी ऐजेण्डा किल नैहोके जनताहुक्रे अनुभूती हुइना मेरके विकास निर्माणहे आघे बह्राइ पर्र्ना मुख्यमन्त्री शाहके प्रतिक्रिया रहल बावै । प्रदेश गौरवके योजना भिट्टर रहल यी सडकहे उहाँ चालु आ.व. २०८१/०८२ मे प्रदेश सरकारसे उक्त सडकखण्ड स्तरोन्नतीके लाग मोहन्याल गाउँपालिकामे वडा नं ७ मे पर्ना बादेखोलामे मोटरपुल निर्माणके लाग रु.२१ करोड ७३ लाख, साघुरे खोलुवामे मोटरपुल निर्माणके लाग रु. १९ करोड ४४ लाख ओ चिसापानी सोल्टा सडक स्तरोन्नतीके लाग रु. १० करोड बजेट विनियोजित करल बटैलै ।
