धनगढी उपमहानगरपालिकासे पायल्स, फिसर ओ फिस्टुलाके निःशुल्क शल्यक्रिया
पहुरा समाचारदाता
धनगढी, ४ बैशाख । धनगढी उपमहानगरपालिकासे पायल्स, फिसर ओ फिस्टुलाके निःशुल्क परीक्षण पश्चात् शल्यक्रिया करे लागल बा ।
चैत २५ से २९ गतेसम धनगढीके टमान पाँच ठाउँमे निःशुल्क स्वास्थ्य शिविर सञ्चालन करल उपमहानगरपालिकासे तीन दिनसम बिरामीके आयुर्वेद पद्धतिअनुसार शल्यक्रिया करे लागल हो ।
काठमाडौंके किर्तिपुर आयुर्वेद अस्पतालके आयुर्वेद सर्जन डाक्टर मदन भण्डारी बिरामीके शल्यक्रिया करटी रहल आयुर्वेद स्वास्थ्य शाखा प्रमुख डाक्टर रविन्द्रकुमार यादव बटैलै । चैत २५ से २९ गतेसम उपमहानगरपालिकाके वडा नम्बर १८, वडा नम्बर १६, वडा नम्बर ११, वडा नम्बर १० ओ वडा नम्बर ४ मे निःशुल्क स्वास्थ्य शिविर धारल रहे । स्वास्थ्य शिविरमे २५६ जाने बिरामीहे उपचार तथा परामर्श सेवा प्रदान करल डाक्टर यादव बटैलै ।
स्वास्थ्य शिविरमे आइल बिरामी मध्ये ५३ जानेक पायल्स, फिसर ओ फिस्टुलाके छारसुत्र बिधिसे शल्यक्रिया कैना सिफारिस करल रहे । ५३ जाने मध्ये बैशाख ३ गते १६ जानेक शल्यक्रिया हुइल बा कलेसे बाँकी बिरामीके बैशाख ४ ओ ५ गते उर्मा आयुर्वेद औषधालयमे शल्यक्रिया हुइना डाक्टर यादव बटैलै ।
हरेक महिना वडामे विशेषज्ञ वडा क्लिनिक सञ्चालन करटी रहल उपमहानगरसे समय–समयमे क्यान्सर लगायतके बिरामी पत्ता लगैना निःशुल्क स्वास्थ्य शिविर सञ्चालन करटी आइल बा । यी बार पायल्स, फिसर फिस्टुलाके बिरामीके निःशुल्क स्वास्थ्य परीक्षण ओ शल्यक्रिया करे लागल हो ।
