मनोसामाजिक अपांगता सम्बन्धी सचेतना
पहुरा समाचारदाता
धनगढी, ४ बैशाख । धनगढी उपमहानगरपालिका वडा नम्बर ९ मे मनोसामाजिक अपांगता सम्बन्धी सचेतना कार्यक्रम हुइल बावै ।
कोसिस नेपालके आयोजना तथा वडा नम्बर ९ के सहकार्यमे कार्यक्रम हुइल हो । कार्यक्रममे डा. राम प्रसाद लामिछाने मानसिक रोग बारे जानकारी डेहल रहिट । उहाँ कौनो फेन व्यक्तिके बानी व्यवहार, सोच, विचारमे परिवर्तन होके दैनिक क्रियाकलाप कैना समस्या हुइनाहे मानसिक समस्या वा मानसिक रोग हुइना बटैलै ।
उहाँ नेपालमे मानसिक समस्या रहल मनैनहे हेर्र्ना दृष्टिकोण मजा नैरहल ओरसे मानसिक बिरामीहरुे उपचार कैना चुनौती रहल बटैलै ।
गरिबी, वंशाणुगत कारण, बच्चा बेलाके वातावरण, सामाजिक विकृती, तनावग्रस्त जिवनशैली, मादक पदार्थके सेवन तथा लागुऔषधके प्रयोग मानसिक समस्याके कारण रहल बटाइल बावै ।
कलेसे कानमे आवाज अइना, असामान्य चीज डेख्ना, गलत चीजमे सत्यता खोज्ना, कौनो चीजमे दुविधा वा झुक्किना, ढेर रिसैना, दैनिक कार्य पुरा नैकरे सेक्ना मानसिक रोगके लक्षण रहल बटाइल बावै ।
डा. लामिछाने मानसिक समस्या फेन औरे रोग जस्टे उपचार कैलेसे ठिक हुइना हुइल ओरसे आपन बारेम औरे जनहनसे खुलके बट्वाइना, मजासे सुट्ना, स्वस्थ्य खानपिन, दैनिक शारीरिक करसर कैना, काममे व्यस्त हुइना, अनावश्यक तनाव नैलेना, मादक पदार्थ ओ लागु औषधके सेवन नैकैना ओ लगातार स्वास्थ्य परीक्षण कैना सुझाव डेलै ।
मनोसामाजिक परामर्श कर्ता सदिक्षा चौधरी बालबालिकाहे हुइना अटिजमके समस्याबारे जानकारी कराइल रही । उहाँके अनुसार अटिजम रहल बच्चा औरेक बारेम वास्ता नैकैना, आँखीमे आँख जुधाके बात करे नैसेक्ना, उमेर अनुसार बोले नैसेक्ना ओ कौनो व्यवहार बारम्बार करटी रहना जैसिन समस्या हुइना बटैली ।
ओस्टके उहाँ अटिजम रहल बालबालिका कुहीसे नैबोल्ना, औरे जनहनसँग घुलमिल नैहुइना, अकली खेलक लाग रहना, सामाजिक क्रियाकलापमे चासो नैडेना, नाउँ लेके बोलैलेसे प्रतिक्रिया नैडेना, कौनो एक चिजमे किल ध्यान डेटी रहना, वस्तुप्रति अनौठो लगाव, दोहोरो सम्वाद नैकैना, आपन भावना व्यक्त करे नैसेक्ना, औरेक भावना नैबुझ्ना, उमेर अनुसार बोलीके विकास नैहुइना बटाइल रही ।
कार्यक्रमके बर्का पहुना तथा वडा अध्यक्ष तथा प्रेम भण्डारी मनोसामाजिक अपाङगतासे ढेर व्यक्ति दुःख पैटी रहल बटैले । मानसिक समस्या रहल मनैनहे समाजके हेर्र्ना दृष्टिकोण फरक रहल ओरसे उहाँ उ मेरके समस्या रहल व्यक्ति समाजमे खुलके नैआइल ओरसे ढेर समस्या भोगे पर्ना बटाइल रहिट । साथे वडा अध्यक्ष भण्डारी मानसिक स्वास्थ्य सम्बन्धी सक्कु जनहनहे सचेतना आवश्यकता रहल बटाइल रहिट ।
कोसिस नेपालके अध्यक्ष मनोज चौधरी समाजमे मनोसामाजिक अपाङगता प्रति चेतना अभिवृद्धि कैना, अपांगता रहल व्यक्तिप्रति सकारात्मक सोच विकास कैना ओ ओइनहे सम्मानजनक जीवनयापन कैना आवश्यक सहयोग प्रदान कैना रहल बटाइल रहिट । कार्यक्रमके सञ्चालन कोसिस नेपालके प्रतिनीधी सरिता चौधरी करल रही । कार्यक्रममे जनप्रतिनीधी, गाउँघरके बरघर भलमन्सा, महिला समूहके प्रतिनीधी, महिला स्वास्थ्यकर्मी लगायतके सहभागिता रहल रहे ।
