कृषि बधुवा मजदुरके सवाल सम्बोधन कैना आग्रह
पहुरा समाचारदाता
काठमाडौं, ५ बैशाख । संघीय सरकारके अइना नीति, कार्यक्रम ओ बजेट मार्फत कृषि बधुवा मजदुरः मुक्त हरवाचरवा, हलिया, कमैया ओ कमलरीके पुनःस्थापनाके सवाल सम्बोधनके लाग राष्ट्रिय कृषि बधुवा मजदुर संघर्ष समितिसे सरकारहे सरकारहे आग्रह करले बा ।
ओकर लाग संघर्ष समितिके संयोजक दशनलाल मण्डलके नेतृत्वमे रहल टोलीसे भूमि ब्यवस्था, सहकारी ओ गरिवी निवारण मन्त्री बलराम अधिकारी, नेकपा (एमाले), नेकपा (माओवादी केन्द्र) पार्टी संसदीय दलके कार्यालय ओ जनमत पार्टीके केन्द्रीय अध्यक्ष सिके राउतहे भेटघाट करके अपन माग प्रस्तुत करले बा ।
राष्ट्रिय कृषि बधुवा मजदुर संघर्ष समितिके संयोजक दशनलाल मण्डलसे हस्ताक्षरित ज्ञापन पत्रमे मुक्त हलिया, कमैया कम्लहरी तथा हरवाचरवा वस्तुस्थिति अध्ययन समितिसे भूमिव्यवस्था, सहकारी तथा गरिवी निवारण मन्त्रालयहे पेश करल सिफारिस सहितके प्रतिवेदनके अक्षरसः लागू करटी राजनीतिक, आर्थिक ओ सामाजिक परिवर्तनके अनुभूति करैना एक प्रभावकारी एकीकृत पुनःस्थापना प्याकेज घोषणा कैना माग करल बा ।
ओस्टेक करके भूमि ब्यवस्था मन्त्रालयसे तयार करल पुनःस्थापना सम्बन्धी कार्यविधि ओ कार्ययोजनाहे अबिलम्व मन्त्री परिषदसे पारित करके अइना आवसे आवश्यक बजेट ओ तीनु तहमे प्रभावकारी रुपमे हलहाली कार्यन्वयनके लाग प्रक्रिया आघे बह्रैना माग करल बा ।
ज्ञापनपत्रमे मुक्त हलिया, कमैया, कम्लहरी ओ हरवाचरवाहुकनके समस्याके दिगो समाधान कैना, पुनःस्थापना कार्यक्रमहे प्रभावकारी बनैना ओ वाध्यकारी श्रमहे कानुनी रुपमे निषेध कैना एकीकृत बाध्यकारी श्रम निषेध कैना बनल ऐन पारित करेपर्ना, हरवाचरवा, कमैया, कम्लहरी तथा हलियाके छुट तथ्याँक अविलम्व लेके प्रमाणीकरण ओ गलत प्रमाणीकरण सच्यइना कार्य तुरुन्त कैना जिल्लास्तरीय संयन्त्रहे निर्देशित कैना ओ पुनस्र्थापनाके कार्य साथसाथे आघे बढाई पर्ना ओ मुक्त कमैया कम्लहरी, हलिया तथा हरवाचरवाके पुनस्र्थापना सम्वन्धी बाँकी सक्कु कामके रेखदेख, संयोजन, परिचालन ओ अनुगमन कैना विषयविज्ञ, मन्त्रालयके अनुभवी कर्मचारी ओ कमैया, कम्लहरी, हलिया ओ हरवाचरवाके अर्थपूर्ण प्रतिनिधित्व रहल ‘अधिकार सम्पत्र पुनस्र्थापना आयोग’ गठन कैना लगायतके माग आघे सारल बा ।
नेपाली समाजमे विद्यमान दासप्रथाके अवशेषके रुपमे रहल हलिया, कमैया, कम्लहरी तथा हरवाचरवा प्रथाके विरुद्ध ह्ुइल न्यायपूर्ण आन्दोलनपश्चात वि.सं. २०५७ सावन २ गते करल कमैया मुक्तिके घोषणा, हलिया आन्दोलनके सम्झौताहिन संघर्षपश्चात वि.सं. २०६५ भदौ २१ गतेके हलिया मुक्तिके घोषणा, कम्लहरीहुकनके सामाजिक न्यायके आन्दोलन पश्चात वि.सं. २०७० सावन ३ गते कम्लहरी मुक्तिके घोषणा ओ हरवाचरवाके न्यायपूर्ण आन्दोलन पश्चात वि.सं. २०७९ सावन २ गते हरवाचरवाके मुक्तिके घोषणा करल रहे ।
नेपाल सरकारसे हालसम ३२,५०९ कमैया परिवार तथा १४,७७५ हलिया परिवारहे परिचयपत्र प्रदान करले बा । जेम्ने मध्ये २५ हजार १९५ मुक्त कमैया परिवारसे पूनस्र्थापनाके लाग २ धुरसे ५ कट्टासम जग्गा पैले बटै कलेसे १३ हजार ५४६ मुक्त हलिया परिवारसे पूनस्र्थापनाके प्याकेज पैले बटै । अभिनफे बहुसंख्यक हलिया ओ कमैया परिवार पहिचान ओ प्रमाणीकरण हुइनासे छुट हुइल बटै । कलेसे मुक्त हरवाचरवाके तथ्याक संकलन समेत शुभारम्भ हुइल नैहो । मुक्त कम्लहरीके पुर्नस्थापनामे कौनो प्रगति हुई नैसेकल हो ।
मुक्त हरवाचरवा, हलिया, कमैया ओ कम्लहरी मुक्तिहे यथार्थमे बदल्न हो कलेसे मुक्त हलिया, कमैया कम्लहरी तथा हरवाचरवा वस्तुस्थिति अध्ययन समितिसे भूमिव्यवस्था, सहकारी तथा गरिवी निवारण मन्त्रालयहे पेश करल सिफारिस सहितके प्रतिवेदनके अक्षरसः लागू करटी राजनीतिक, आर्थिक ओ सामाजिक परिवर्तनके अनुभुति करैना एक प्रभावकारी एकीकृत पुनःस्थापना प्याकेज घोषणा कैना माग कैगिल बा ।
