नेपाल महिला संघ कैलारीसे शुभकामना आदनप्रदान कार्यक्रम
पहुरा समाचारदाता
हसुलिया, ९ बैशाख । नेपाल महिला संघ कैलारी गाउँपालिकाके आयोजनामे सोम्मारके रोज कालिमाईमे शुभकामना आदनप्रदान तथा भेटघाट कार्यक्रम कैगिल बा । संघसे नयाँ बर्ष २०८२ सालके उपलक्ष्यमे शुभकामना आदनप्रदान तथा भेटघाट कार्यक्रम कैगिल हो ।
नेपाल महिला संघ कैलारी गाउँपालिका अध्यक्ष कृष्णा चौधरीके अध्यक्षतामे हुइल कार्यक्रममे सुदूरपश्चिम प्रदेश नीति तथा योजना आयोगके उपाध्यक्ष डा. जीवन राना प्रमुख अतिथि रहल रहिट । कार्यक्रममे सम्बोधन करटी थारु समुदाय आपन अधिकार स्थापित करेक लाग एकजुट होके लागे पर्ना बटैली ।
कैलाली कञ्चनपुरके पहिल बासिन्दा थारु समु्दाय रहल ओ यहाँ बैठना लायक बनुइयाफे थारु समुदाय रहल उहाँ बटैली । औलो मलेरियासे जिटके बैठल कारण थारु समुदाय सिकलसेल एनिमिया रोग थारु समु्दायमे केल डेखा परल ओरसे यी संगे और रोग नैलागे डेना सचेतना अपनैना आग्राह करली ।
थारु समुदायके भाषा, कला, संस्कृति लगान, खानपानमे अपने खालके सुन्दरता बा, फरक पहिचान बा । पुरुष मेचीसे पश्चिम महाकालीसमके थारु समुदायके भाषा फरक रहलेसेफे एक रहल ओरसे एक हुके आघे बह्रेपर्ना जरुरी रहल बटैली । थारु समुदायके महिलाहुकनके सुदूरपश्चिम प्रदेश सरकार नेपाली काँग्रेस सम्मान करलपाछे अपने लगायत ढेर महिला निर्णयक ठाउँमे पुग्ना सफल हुइल बटैली ।
ओस्टेक करके उहाँ आपन लर्कनके भविष्य बनैन लर्कनके शिक्षामे ढेर डेहे पर्ना, ओ थारु समु्दायके यूवा लागु औषधमे फस्टी गैलसे उहोर ध्यान डेहे पर्ना बटैली ।
कार्यक्रममे विशिष्ट पहुना नेपाली काँग्रेस कैलालीके कार्यबाहक सभापति खेमराज डगौरा नेपालीके सक्कु संगठन सक्रिया हुइलेसे कैलारीमे नेपाली काँग्रेसके कबु हार नैहुइना बटैलै । कैलारीमे नेपाली काँग्रेस नेतृत्वके सरकार ढेर काम करल मने प्रचारप्रसारके कमी हुइल बटैलै ।
नेपाली काँग्रेस सुदूरपश्चिम प्रदेश सदस्य तथा कैलारी गाउँपालिका अध्यक्ष राजसमझ चौधरी जनताके चाहना आपेक्ष ढेर रना मने सिमित बजेटके कारण कहल जैसिन विकास करे नैसेकल बटैलै । गाउँपालिकासे प्राथमिकताके आधारमे बजेट विनियोजन करके आघे बह्रल बटैलै ।
गाउँपालिका उपाध्यक्ष भगवतीकुमारी चौधरी महिला अधिकार पानामे केल सिमिट रहल बटैली । व्यवहारमे लागु करे नैसेकल बटैली । महिलाके आवाज जबफे डबल रहठ, सुनुवाई नैहुइठ, पितृ सत्ताके सोचमे अभिनफे हाबी रहल बा उहाँ कहली । महिलाहुक्रे आर्थिक पाटोमे कम्जोर रहल ओरसे सीपमुलक आयम कार्यक्रमसे जोरना जरुरी रहल बटैली ।
कार्यक्रममे नेपाल महिला संघ कैलालीके शारदा सुनाम, जिल्ला समन्वय समिति कैलालीके सभापति टीकाकुमारी चौधरी भुल, नेपाली काँग्रेस कैलाली क्षेत्र नम्बर ३ के क्षेत्रीय सभापति रिता चौधरी, भूमि समस्या समाधान आयोगके जिल्ला सदस्य रामकुमारी चौधरी, नेपाली काँग्रेस महाधिवेशन प्रतिनिधि माया चौधरी, महाधिवेशन प्रतिनिधि मनिराम चौधरी, नेपाली काँग्रेस थारु आयोगके सदस्य सरिता चौधरी, नेपाली काँग्रेस कैलारी गाउँपालिका सभापति कृष्ण प्रसाद चौधरी, नेपाल महिला संघ क्षेत्रीय सभापति नन्दा शर्मालगायत मन्तव्य व्यक्त करल रहिट । कार्यक्रममे स्वागत मन्तव्य गीता चौधरी ओ संचालन मञ्जु चौधरी करल रहिट ।
कार्यक्रममे कैलारी गाउँपालिका वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ५ के अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेमबहादुर चौधरी, वडा नम्बर ७ के वडा अध्यक्ष दिपेन्द्र बहादुर बम, वडा नम्बर ९ के वडा अध्यक्ष खेमराम चौधरी, कार्यपालिका सदस्य, वडा सदस्यहुक्रे, नेपाली काँग्रेसके महासमिति सदस्यहुक्रे, महाधिवेशन प्रतिनिधिहुक्रे, क्षेत्रीय कार्यसमिति, जिल्ला सदस्य, वडा सभापति, नेपाली काँग्रेस अन्र्तगत टमान संगठन ओ विभागके प्रमुख ओ प्रतिनिधि, महिला संघ कैलारीके सक्कु वडाके प्रतिनिधि महिलाहुकनके सहभागिता रहे ।
