कैलारीमे यौन तथा प्रजनन स्वास्थ्य अधिकार सम्बन्धी स्थानीय कानूनके मस्यौदाबारे छलफल
पहुरा समाचारदाता
हसुलिया, १२ बैशाख । कैलारी गाउँपालिकाके यौन तथा प्रजनन स्वस्थ्य अधिकार सम्बन्धी स्थानीय कानूनके मस्यौदाबारे शुकके रोज हसुलियामे छलफल कार्यक्रम सम्पन्न हुइल बा ।
महिला कानून र विकास मञ्च काठमाडौके आर्थिक सहयोग, केयर नेपालके प्राविधिक सहयोग ओ कैलारी गाउँपालिकाके समन्वयमे हुइल कार्यक्रम गाउँपालिका उपाध्यक्ष भगवतीकुमारी चौधरीके अध्यक्षतामे हुइल हो । कार्यक्रममे सम्बोधन करटी उहाँ ऐन पालिकाके सम्पतिके रुपमे रहल ओरसे हालहाली ल्याने पर्ना बटैले रही ।
कार्यक्रम वडा नम्बर ५ के वडा अध्यक्ष विष्णुप्रसाद चौधरी, सामाजिक विकास शाखा प्रमुख यगम कलेल ऐन कानून बनाके कार्यान्वयन करेपर्ना जोर डेहल रहिट । कार्यक्रममे महिला तथा बालबालिका शाखा प्रमुख बालकुमारी चौधरी, स्वास्थ्य शाखाके अनिता चौधरीलगायतसे सुझाव डेहल रहिट ।
यौन तथा प्रजनन स्वस्थ्य अधिकार सम्बन्धी स्थानीय कानूनके मस्यौदाबारे छलफलमे उ कार्यक्रमके उद्देश्य उप्पर मञ्चके कार्यक्रम प्रवन्धक दिपेश श्रेष्ठ प्रकाश पारल रहिट कलेसे उ मस्यौदाके प्रस्तुतीकरण मञ्चके कार्यकारी निर्देशक सविन श्रेष्ठ करल रहिट ।
कार्यक्रमके संचालन केयर नेपालके कालिदास जोशी ओ स्वागत मन्तव्य स्वास्थ्य शाखा प्रमुख नरेशकुमार चौधरी करल रहिट । कार्यक्रममे वडाके वडाअध्यक्षहुक्रे, टमान शाखाके प्रमुख, कार्यपालिका सदस्यहुकनके सहभागिता रहे । यिहे सुरक्षित मातृत्व तथा प्रजनन स्वास्थ्य ओ अधिकार ऐन २०८२ के मस्यौदा गाउँपालिका उपाध्यक्ष भगवतीकुमारी चौधरीलगायत गाउँपालिकाहे हस्तान्तरण कैगिल बा ।
ओस्टेक करके भजनी नगरपालिकामेफे यौन तथा प्रजनन स्वास्थ्य सम्बन्धी स्थानीय कानूनके मस्यौदाबारे विफेक रोज भजनीमे छलफल कैगिल बा । महिला कानून र विकास मञ्च काठमाडौके आर्थिक सहयोग, केयर नेपालके प्राविधिक सहयोग ओ भजनी नगरपालिकाके आयोजनामे भजनी नगरपालिकाके यौन तथा प्रजनन् स्वास्थ्य अधिकार सम्बन्धी स्थानीय कानूनके मस्यौदामे छलफल सम्पन्न हुइल रहे ।
भजनी नगरपालिकाके नगर प्रमुख केवल चौधरी संविधानमे उल्लेखित महिलाके यौन तथा प्रजनन स्वास्थ्य अधिकारहे कार्यान्वयन करेक लाग स्थानीय तहहे आवश्यक पर्ना कानून निर्माणके कार्यान्वयन कैना विषयमे छलफल कैना बटैलै ।
भजनी नगरपालिका नगर उपप्रमुख राजु तिरुवाके अध्यक्षतामे हुइल कार्यक्रममे उहाँ यौन तथा प्रजनन स्वास्थ्य सम्वन्धी बनाइल ऐनके मस्यौदाहे आवश्यक छलफल सहित कार्यपालिकासे पास कैना बटैली । महिलाके स्तरवृद्धि सहित थप सशक्त बनाईक लाग समुदायस्तरमे यौन तथा प्रजजन स्वास्थ्य अधिकार सम्वन्धी सचेतना अभिवृद्धि कैना आवस्यक डेखल उहाँ बटैली ।
प्रमुख प्रशासकीय अधिकृत नीलमकुमार न्यौपाने यौन तथा प्रजनन स्वास्थ्य सम्वन्धी बनाइल ऐनके मस्यौदा उपर छलफल कैना बटैलै । उहाँ ऐनके मस्यौदाहे थप सशक्त बनैना आवश्यक सल्लाह सुझाव सहित पालिकाके स्वास्थ्य शाखामे बुझाई सेक्ना बटैलै ।
कार्यक्रममे वडा नं १से ९ समके वडा अध्यक्ष, प्रसाशन अधिकृत चन्ददेव भट्ट, कार्यपालिका सदस्य ओ विषयगत शाखा प्रमुख लगाएतके सहभागिता रहे ।
उ कार्यक्रमके उद्देश्य उप्पर मञ्चके कार्यक्रम प्रवन्धक दिपेश श्रेष्ठ प्रकाश पारल रहिट कलेसे उ मस्यौदाके प्रस्तुतीकरण मञ्चके कार्यकारी निर्देशक सविन श्रेष्ठ करल रहिट । कार्यक्रमके समन्वय तथा सहजीकरण कालीदास जोशी ओ कैलाश चौधरी करल रहिट ।
