गढीबाबा मेला बैशाख २९ गतेसे आयोजना हुइना

पहुरा समाचारदाता
धनगढी, १४ बैशाख । चर्चित गढीबाबा मेला यी बरस बैशाख २९ गतेसे लग्ना हुइल बावै ।

कैलालीके सीमावर्ती भारतीय गाउँ बेलापरसुआमे यी मेला विगत लम्मा समयसे लग्टी आइल बावै । यी बरसके मेला मे १२ से २० तारेकसम आयोजना हुइना ५७ वर्ष स्वर्गीय साहब लाल श्री गढीबाबा मेला समिति जानकारी डेले बावै । मेलामे रामलीला, थारु साँस्कृतिक कार्यक्रम, सर्कस, मौतके कुँवा विशेष आकर्षण रहना जनाइल बावै ।

ओस्टके, मेलामे गढीबाबा क्रिकेट टुर्नामेन्ट ओ फुटबल पेनाल्टी टुर्नामेन्टके फेन आयोजना करजैना स्थानीय लल्लन कठरिया जानकारी डेले । क्रिकेट टुर्नामेन्ट विजेताहे नगद २० हजार भारु ओ उपविजेताहे ११ हजार भारु पुरस्कार डेना जनाइल बावै । ओस्टके, फुटबल टुर्नामेन्ट विजेताहे नगद १५ हजार भारु ओ उपविजेताहे आठ हजार भारु पुरस्कार डेना बावै ।
यी मेला अवलोकनके लाग कैलाली, बर्दिया लगायत टमान जिल्लासे नेपालीसमेत पुग्ना करल बटै । गढीबाबा ढेउर पुरान मेला मानजाइठ् ।